काठमाडौँ– नेपाल कम्युनिस्ट पार्टी (नेकपा) दाहाल–नेपाल पक्षका अध्यक्ष माधवकुमार नेपालले प्रधानमन्त्री ओलीको तानाशाही प्रवृत्तिका कारण सिंगो मुलुकले संकट भोग्नु परेको आरोप लगाएका छन् ।

बिहीबार नेपाल बुद्धिजीवी संगठनले काठमाडौंमा गरेको कार्यक्रममा अध्यक्ष नेपालले ओलीले भनेको कुरा नमान्नु नै आफूहरुको अपराधजस्तो भएको भएको बताए ।

उनले ओलीको तानाशाही प्रवृत्तिमाथि सिंगो मुलुक पिल्सिरहेको आरोप लगाए ।

ओली बदलाको भावनाबाट अघि बढ्ने र अलोकतान्त्रिक चरित्र भएको उनले आरोप लगाए । ‘संवैधानिक कू’ भएका बेला चुनावको अर्थ नभएको बताउँदै उनले वैशाखमा चुनाव हुनै नसक्ने जिकिर गरे ।

नेकपा केन्द्रीय कमिटी बैठकले ओलीलाई बहुमतले हटाइसकेको भन्दै नेपालले ओलीका असंवैधानिक कदमको विरोध गर्नुपर्ने बताए ।

संविधानको कुनै धारामा प्रतिनिधिसभा विघटन गर्ने व्यवस्था नै नरहेको र हुँदै नभएको धारा राखेर विघटन गरिएको आरोप उनले लगाए । उनले अदालतले ओलीको कदम सच्चाउने विश्वास समेत व्यक्त गरे ।

उनले आफू र प्रचण्ड रहेको पार्टी नै आधिकारिक रहेको दाबी गरे । ‘जबज’ आफैले छोडेका ओलीले अहिले कार्यकर्तालाई दिग्भ्रमित पार्ने काम गरेको आरोप उनले लगाए ।