काठमाडौँ– नेपाल कम्युनिस्ट पार्टी (नेकपा)को माधव नेपाल–प्रचण्ड समूहका अध्यक्ष माधवकुमार नेपालले प्रधानमन्त्री केपी शर्मा ओली झुटको पुलिन्दा भएको आरोप लगाएका छन् ।

दाहाल-नेपाल समूहले काठमाडौंमा गरेको बृहत् कार्यकर्ता भेला तथा प्रशिक्षण कार्यक्रमलाई बुधबार सम्बोधन गर्दै उनले यस्तो आरोप लगाएका हुन्।

‘प्रधानमन्त्री ओलीजी झुटका पुलिन्दा हुन्। उनले के बोलिरहेका छन् थाहा पाइँदैन, केपी ओलीसँग कम्युनिस्ट सिद्धान्तप्रति कुनै प्रतिवद्धता छैन’, उनले भने, ‘उहाँ फोहोरको डंगुर हो, डुङडुङी गन्हाउँदा पनि शरीरमा बोक्नु परेको छ भनेर वामदेव कमरेडले भन्नु भएको थियो। अहिले पनि वामदेव कमरेडलाई सुधार्न बालुवा पेलिरहनु भएको छ। तर केपी ओली सुध्रिने मान्छे होइनन्। उहाँ भाँचिन तयार हुनुहुन्छ तर झुक्न जान्नु हुन्न।’

ओलीले अहिले नेतृत्व गरिरहेको नेकपाको एउटा समूहलाई पनि नेपालले सडक छापको संज्ञा दिए।

नेता नेपालले भने,’ओली आफैं बेकामे हुन्। ओलीको पार्टी सडक छाप हो। सडकको धुलो मात्रै हो।’

उलने ओली शिष्ट नभएको पनि आरोप लगाए । उनले पदमा पुगेपछि ओली निरंकुशता बढ्दै गएको समेत बताए ।