काठमाडौँ– बिहे चलिरहेका बेला बेहुलाले आफ्नी प्रेमिका लिएर मण्डपबाटै भागेपछि बिहे गर्न लागेकी बेहुलीले जन्तीमध्येबाट एक युवक रोजेर उनीसँग त्यही मण्डपमा बिहे गरेकी छिन् ।

भारतको कर्नाटक राज्यको चिकमंगलुरु जिल्लामा यस्तो रोचक घटना भएको हो । बेहुलाले हुनेवाली पत्नीलाई मण्डपमा छोडेर प्रेमिकासँग भागे । बेहुलीले पनि निर्णय लिन ढिलो गरिनन् । उनलदे तत्कालै बिहेमा जन्ती आएका एक युवकसँग बिहे गरिन् ।

बैंगलुरु मिररको रिपोर्टअनुसार नवीन र अशोक नाम गरेका दुई दाजुभाइको एकैपटक बिहे हुन लागेको थियो । अशोकको त बिहे भयो तर नवीन भने बिहे बीचमै छाडेर प्रेमिकासँग भागे । नवीनले बिहेको सबै रिती रिवाजमा भाग लिए तर जब सात वचनको बेला भयो त्यसपछि भने नवीनले जीवनसाथी नै बदलिदिए ।

खासमा बिहेको दिन नै नवीनकी प्रेमिकाले आएर नवीनलाई यदि उनले सिन्धुसँग बिहे गरे भने विवाह समारोहमा आएर विष पिउने र सबै विवाह कार्यक्रम भताभुंग पारिदिने धम्की दिएकी थिइन् ।

यही डरका कारण नवीन बिहे बीचमै छाडेर भागेका थिए । नवीन भागेपछि यो फिल्मी नाटक त्यत्तिकै रोकिएन । सिन्धुले पनि तत्कालै बिहेमा आएका पाहुनाहरुमध्येबाट आफूलाई सुहाउँदो वर खोज्न थालिन् ।

अन्ततः सिन्धुले चन्द्रप्पा नामका युवकलाई आफ्नो जीवनसाथी रोजिन् । चन्द्रप्पा बिहेमा जन्ती आएका थिए र पूरै घटनाको प्रत्यक्षदर्शी थिए । चन्द्रप्पा बीएमटिसीमा बस कण्डक्टर छन् । दुवै परिवारको सहमतिपछि सिन्धु र चन्द्रप्पाको पूरै रितीरिवाजका साथ बिहे भएको हो ।