सिन्धुपाल्चोक– कोरोना भाइरसका कारण चैतदेखि बन्द भएको सिन्धुपाल्चोकको भोटेकोशीको बन्जी जम्प नौ महिनापछि पुनः सञ्चालनमा आएको छ ।

स्वास्थ्य सुरक्षाको मापदण्ड अपनाई सञ्चालनमा ल्याइएको बन्जी जम्पमा हाल दैनिक चारदेखि १५ जनासम्मले बन्जी गर्ने दी लास्ट रिसोर्ट एडभेन्चर प्रालिका व्यवस्थापक कुमार राउतले बताए ।

०५६ देखि सञ्चालित १६० मिटरको उक्त बन्जी जम्प रोमाञ्चकका दृष्टिकोणले उत्कृष्ट मानिन्छ । देशमा बन्दाबन्दी लागू हुनुअघि स्वदेशी र विदेशीसहित दैनिक १०० जनासम्म आउने गरेकामा भर्खर मात्र सञ्चालनमा आएकाले क्रमशः पर्यटक आउने अपेक्षा गरिएको व्यवस्थापक राउतले स्पष्ट गरे ।

बन्जीका लागि युवायुवती बढी आकर्षित हुने र प्रहरी अधिकृत तालिममा सहभागीलाई पनि अनिवार्य रुपमा समावेश गरिएको बताइएको छ । बन्जीका लागि स्वदेशीलाई ६ हजार र विदेशीलाई नौ हजार २०० दस्तुर लिने गरिएको छ । बन्जीका साथै रोमाञ्चक सुइङ पनि सञ्चालनमा आएको छ ।

चीनसँगको प्रमुख व्यापारिक तातोपानी नाका निरन्तर रुपमा सञ्चालनमा आए तिब्बतको मानसरोवर जाने भारतीय तीर्थयात्री नाका हुँदै जाने भएकाले बाह्य र आन्तरिक पर्यटकको सङ्ख्यामा वृद्धि हुने प्रचुर सम्भावना छ ।