काठमाडौँ– सर्वाधिक प्रतिक्षारत नेपाली चलचित्र प्रेमगीत३ को लिरिकल गीत ‘हर युग होस् प्रेमको’ बोलको गीत नौ महिनामा सर्वाधिक १० मिलियन अर्थात १ करोड भ्यूज पाएको छ ।

प्रेमगीत ३ को शीर्ष गीतको रुपमा रहेको हर युग होस् प्रेमको गीतको लिरिकल भिडियो मात्र रिलिज भएको थियो । यो गीतलाई दर्शकले निकै असाध्यै रुचाएका छन् ।

यो गीतको शब्द राजेश कुमार श्रेष्ठ संगीत एलिश कार्की र आवाज प्रताप दास र प्रविशा अधिकारीको रहेको छ । यो समाचार तयार पारिरहदाँ यस गीतलाई १ लाख १२ हजार ३ सय ५० जनाले लाइक गरेका छन् भने ५ हजार ३ सय ५० जनाले डिसलाइक गरेका छन् । यस्तै गीतमा ७ हजार बढी कमेन्ट प्राप्त छन् ।

चलचित्र प्रेमगीत ३ मा प्रदिप खड्का, नव नायिका कृष्टिना गुरुङ, सुनिल थापा, शिव श्रेष्ठ, संतोष सेन, माओत्से गुरुङग, प्रेम पुरी, नवनायक मनिष रावत, अनुभव रेग्मी, सुजल बस्नेत, सम्बृद्धि शाही ठकुरी, योगीसा खत्री, लक्ष्मी बर्देवा, क्रिजल गौतम लगायतका कलाकारको मुख्य भूमिका छ ।

संतोष सेन निर्माता रहेको फिल्ममा सहनिर्माता कुमार सान शाह र ओएसआर डिजिटल छन् । भने कार्यकारी निर्माता चक्र बहादुर चन्द र मिलन सेन रहेको चलचित्र प्रेमगीत ३ लाई सन्तोष सेन र स्वर्गीय निर्देशक छेतेन गुरुङले संयुक्त रुपमा निर्देशन गरेका हुन् । गतबर्षको चैत्रमा २८ गते प्रदर्शनमा आउने तयारीमा थियो । तर कोरोना महामारीका कारण चलचित्रको प्रदर्शन रोकिएको थियो हो । हलहरु अहिलेसम्म नखुलेका कारण चलचित्रको प्रदर्शन मिति अझैपनि अन्योलमा रहेको छ ।