एजेन्सी- तिब्बतको निर्वासित सरकार प्रमुख डा. लोबसाङ साङ्गे अमेरिका पुगेका छन् ।

अमेरिका पुगेलगत्तै डा. साङ्गेले शुक्रबार ह्वाइट हाउसका तिब्बती मामिलाका नवनियूक्त समन्वयकर्ता रोबर्ट डेस्ट्रोसँग भेट गरेको टाइम्स अफ इण्डियाले जनाएको छ ।

तिब्बतको निर्वासित सरकार प्रमुखको अमेरिका भ्रमण ६ दशकमा यो पहिलो भएको जनाइएको छ ।

केन्द्रीय तिब्बती प्रशासन(सिटिए)का लागि यो एउटा ऐतिहासिक कदम भएको विज्ञहरू बताउँछन् ।

यसले सिटिएको प्रजान्त्रिक व्यवस्था र यसका राजनीतिक प्रमुखलाई मान्यता प्रदान गरेको उनीहरूको भनाइ छ।

‘हामी खुशी छौं किनकी दुई लोकतन्त्रले एकअर्कालाई मान्यता दिइरहेका छन्। सिटीए र यसका नेताको ह्वाइट हाउसमा स्वागत हुनु एउटा राम्रो सुरूवात हो,’ सिटिएका प्रवक्ताले भने।

यस घटनाले पहिलेदेखि नै तनावमा रहेको चीन-अमेरिकी सम्बन्धमा अझ तनाव बढाउने उल्लेख गरेको छ।

चीनले तिब्बतलाई आफ्नो महत्वपूर्ण भूभागका रूपमा हेर्दै आएको छ भने भारतसहितका पश्चिमा मुलुकले तिब्बतको स्वतन्त्रताका पक्षमा कुरा गर्दै आएका छन् ।