काठमाडौँ- नेपाली कांग्रेसका नेता प्रकाशमान सिंहले कोरोना महामारीका बेलासमेत सरकार रमिते मात्रै बनेको आरोप लगाएका छन् ।

आफ्नो निर्वाचन क्षेत्रमा आइतबार मतदातहरूसँगको भेटघाट कार्यक्रममा सरिक भएका सिंहले महामारीले जनता मर्कामा पर्दा पनि सरकार रमिते बनेको आरोप लगाएका हुन् ।

‘यो सरकार स्वार्थमा डुबेको छ । भ्रष्टाचारमा लिप्त छ,’ पूर्वउपप्रधानमन्त्रीसमेत रहेका नेता सिंहले भने,  ‘मुलुकका तमाम समस्यामा सरकार बेखबर छ । यो लोकतन्त्रवादीहरुका लागि समेत अशोभनीय हो ।’

सरकारले संघीयताको मर्म र भावनाअनुसार नीति निर्माणमा समेत चासो नदिनु दुःखद् भएको उनले बताए ।

यतिबेला प्रमुख प्रतिपक्षीको रुपमा कांग्रेसले उठाउनु पर्ने विषय उठाउँदै आए पनि सरकारले नसुनेको उनले बताए ।

कोरोना महामारीका कारण तत्कालै सडक आन्दोलनमा जाने अवस्था नरहेको बताउँदै उनले भने, ‘भन्नुपर्ने ठाउँमा भनेकै छ, बोल्नुपर्ने ठाउँमा सबैले बोलेकै छ । तर, यो सरकारले सुन्दैन । यो सरकारले न जनताको आवाज सुन्छ, न प्रतिपक्षीको ।’

सरकारले कोरोना महामारीको बेला गर्नुपर्ने न्यूनतम काम पनि गर्न नसकेको बताउँदै उनले अब आफ्नो सुरक्षामा आफैं लाग्नुपर्ने बताए ।

काठमाडौं क्षेत्र नम्बर १ बाट निर्वाचित प्रतिनिधिसभा सदस्यसमेत रहेका नेता सिंहले अब संसद बैठक तत्काल डाकेर हरेक विषयमा छलफल हुनुपर्ने बताए ।

‘विषम परिस्थितिमा समेत सरकार भ्रष्टाचारमा लिप्त भयो, जनजीविकाका सवालमा त झन् गैरजिम्मेवार देखिन्छ,’ सिंहले भने,’सडक आन्दोलनमा जान सक्ने परिस्थिति छैन, तत्काल संसद बैठक डाकेर तमाम् विषयमा छलफल गरियोस् ।’

आफ्नो निर्वाचन क्षेत्रमा स्थानीय नागरिकसँग सामाजिक दूरी कायम राख्दै उनले विकास निर्माणमा भइरहेका प्रगती र जनगुनासो सुन्दै आएका छन् ।