मानहुँकोट – तनहुँको मानहुँकोट यतिबेला चर्चामा छ ।

कोरोना कहरले विश्व आक्रान्त भई आम नेपालीलाई अत्यावश्यक काम नपरी घरबाहिर नजान सरकारले बारम्बार भनिरहँदा मानहुँकोटको डाँडामा हिजोआज हरेक दिन बिहानैदेखि हजारौं मान्छेहरु लाम लागेका देखिन्छ ।

तनहुँको ब्यास नगरपालिका ५ स्थित मानहुँकोट डाँडामा न त यहाँ कुनै मठ मन्दिर छ, न कुनै भौतिक संरचना नै ।

तर तनहुँको सदरमुकाम दमौलीमा घाम छेक्ने नाङ्गो डाँडा मानहुँकोटमा कोरोना संक्रमणको उच्च जोखिम मोलेरै भए पनि मानिसको लर्को लाग्ने गर्छ ।

समुद्र सतहदेखि करिब २३ सय मिटर उचाइमा रहेको मानहुँकोट यसअघि मगरबस्तीका रुपमा चिनिन्थ्यो । पानीको अभावले गर्दा बस्ती विस्थापित हुँदै गयो ।

खाल्डो खनेर पोखरीमा जम्मा गरेको पानी खानुपार्ने बाध्यता थियो मानहुँकोटबासीलाई । मानहुँकोट डाँडा आसपास अहिले ७ घर मात्रै बाँकी छन ।

अहिले पनि कुनै पनि सुविधा पाउन नसकेको मानहुँकोट डाँडामा दशैं अवधिमा धेरै मानिसले अवलोकन गरे । मानिसहरुको बढ्दो चहलपहललाई देखेर ब्यास नगरपालिका मात्र होइन, देशैभरीका पर्यटन ब्यवसायीहरु चित परे ।

बास्तवमा त्यहाँबाट सेताम्मे देखिने अन्नपूर्ण र मनास्लु हिमाल नै यहाँको आकर्षण बनेको हो । यतिबेला मानिसहरु त्यही हिमालको दृश्यावलोकन गर्न मानिसहरु त्यहाँ पुगे । हिमालको मनमोहक दृष्यले मात्र नभएर दमौलीलाई कुहिरोले ढाकेको दृष्य पनि उत्तिकै आकर्षित बन्ने गरेको छ ।

व्यास नगरपालिकास्थित पृथ्वी राजमार्गको चापाघाटबाट ६ किलोमिटरको दूरीमा रहेको रहेको मानहुँकोटमा आन्तरिक पर्यटकको अत्याशित चाप बढेपछि नगरपालिकाले उक्त ठाउँमा जग्गा किनबेचमा रोक लगाएको छ ।

कोरोना संक्रमणका कारण दैनिक ३ सय भन्दा बढी मान्छे प्रवेश गर्न रोक लगाउने नगरपालिकाले निर्णय गरे पनि अहिले पनि दैनिक हजार मानिसहरु पुग्ने गरेको बताइन्छ ।

मानहुँकोटलाई पर्यटन प्रवर्द्धन गर्न भन्दै नगरपालिकाले पूर्वाधार निर्माण कार्य तीब्र बनाएको छ । नगरप्रमुख बैकुण्ठ न्यौपानेका अनुसार डाँडामा ३७ लाख लगानीमा भ्यू टावर तथा शौचालय र खानेपानीको ब्यवस्था गरिँदैछ भने सडक कालोपत्रे गर्ने काम पनि अघि बढाइएको छ ।

पर्यटन प्रवर्द्धन गर्ने उद्देश्यले मानहुँकोटमा पूर्वाधार निर्माणका लागि नगरपालिकाले २५ लाख रुपैयाँ बजेट छुट्याएको छ ।

एक्कासी सो क्षेत्रमा दैनिक मानिसहरुको भीड बढ्न थालेपछि  नवलपुरबाट पुगेका निरज तिमिल्सिनाले भने– ‘साँच्चिैकै स्वर्ग रहेको मानहुँकोट ।’