प्रविधिको विकाससँगै अहिले स्मार्ट टेलिभिजन (टिभी)को प्रयोग बढ्दो मात्रामा छ ।

टिभी उत्पादन गर्ने कम्पनीहरुले मूल्य र सुविधाका हिसावले बजारमा प्रतिस्पर्धा गरिरहेका छन् । केही कम्पनीले सस्तैमा स्मार्ट टिभी उपलब्ध गराइरहेका छन् भने केही कम्पनीले भिन्न खालका फिचरसहित टिभीहरु बजारमा पठाइरहेका छन् ।

जापानी मल्टिइलेक्ट्रिक कम्पनीले पानासोनिकले विश्वकै पहिलो पारदर्शी टिभी बजारमा ल्याएको छ ।

यो टिभी बन्द अवस्थामा काठको फ्रेममा राखिएको सिसा जस्तै देखिन्छ । तर, जब तपाईंले यसको स्वीच अन गर्नुहुन्छ यो, ओएलइडी डिस्प्लेमा परिवर्तन हुन्छ ।

पानासोनिकले स्वीस फर्निचर ब्राण्ड विटरासँग मिलेर यो टिभी डिजाइन गरेको हो ।

दुवै कम्पनीले करिब २ वर्षको अध्ययन पछि यो टिभी निर्माण गरेका हुन् ।

यो टिभीलाई प्रयोग नगरिएको अवस्थामा तपाईंले आफ्नो लिभिङ रुममा सजाएर पनि राख्न सक्नुहुने छ । यद्यपि यो टिभी बिक्रीका लागि बजारमा कहिलेदेखि उपलब्ध हुनेछ भनेर पानासोनिकले अहिले नै केही बताएको छैन ।