काठमाडौं– स्वास्थ्य तथा जनसंख्या मन्त्रालयले होम आइसोलेसनमा हुने कोरोना संक्रमितलाई टेलि मेडिसिन सेवा दिन इच्छुक स्वास्थ्यसंस्थालाई सम्पर्कमा आउन आग्रह गरेको छ ।

मन्त्रालयअन्तर्गत रहेको स्वास्थ्य सेवा विभागको उपचारात्मक सेवा महाशाखाले कोरोना संक्रमणको समयमा होम आइसोलेसनमा रहेका संक्रमितलाई टेलिमेडिसिन सेवाद्धारा स्वास्थ्य सेवा परामर्श सामान्य उपचार, थप आवश्यक सूचना प्रदान गर्न इच्छुक स्वास्थ्यसंस्थालाई सूचीकृत हुन आग्रह गरेको हो ।

सेवा दिन इच्छुक स्वास्थ्यसंस्थाका सेवा प्रदायक स्वास्थ्यकर्मीहरु सम्बन्धित परिषद्हरुमा दर्ता हुनुपर्ने पनि महाशाखाले जनाएको छ ।

पछिल्लो समय कोरोना संक्रमित बढ्दै जाँदा होम आइसोलेसनमा रहने संक्रमितको संख्या पनि बढी छन् । होम आइसोलेसनमै सामान्य लक्षण देखिएका संक्रमितहरु समेत रहेको र स्वास्थ्य परामर्शको अभावमा उनीहरुमा पछि समस्या थपिने गरेको छ ।

यस्तै पछिल्लो समय होम आइसोलेसनमा रहेका कोरोना संक्रमितको मृत्यु समेत हुन थालेपछि स्वास्थ्य मन्त्रालयलले होम आइसोलेसनमा हुने संक्रमितलाई टेलि मेडिसिन सेवा दिने निर्णय गरेको थियो ।