पोखरा- काकाको हत्या गरेको आरोपमा प्रहरीले लमजुङबाट एक जनालाई पक्राउ गरेको छ ।

प्रहरीका अनुसार पक्राउ पर्नेमा पोखरामा बसेर ज्याला, मजदुरी गरेर बस्दै आएका ओखलढुंगाका इन्द्रबहादुर तामाङ छन् ।

जिल्ला प्रहरी कार्यालय कास्कीका डीएसपी सुवास हमालका अनुसार २०७६ साल कार्तिक महिनादेखि पोखरामा पद मार्ग निर्माणको काम गर्दै आएका ५५ वर्षीय टंकबहादुर तामाङ बैशाख २१ गते मृत अवस्थामा भेटिएको थियो ।

डीएसपी हमालले भने, ‘तामाङको टाउको र अनुहारमा चोटपटक लागि नाक, मुख र कानबाट रगत निस्केको अबस्थामा शव फेला परेको थियो, शंका लागि अनुसन्धान गर्दा उनकै भतिज इन्द्रबहादुर तामाङले झगडा पर्दा हत्या गरेको प्रारम्भिक अनुसन्धानबाट खुलेको छ ।’

प्रारम्भिक सोधपुछको क्रममा उनले घटना स्वीकार गरिसकेका छन् । मृतकका छोराले इन्द्र बहादुर तामाङका विरुद्धमा किटानी जाहेरी दिएका थिए ।

किटानी जाहेरी परेपछि प्रहरीले खोजतलास गर्दा सोमबार लमजुङको सोती पसलमा फेला पारेको डीएसपी हमालले जानकारी दिए ।