दोहा- साउदी अरबमा गैरकानुनी रुपमा बसेका १ हजार १३१ जना नेपालीले एक्जिट भिसा (बहिर्गमन भिसा) पाएका छन् ।

साउदीस्थित नेपाली दूतावासको अनुरोधमा साउदी सरकारले यो प्रकृयाकाे थालनी भएदेखि हालसम्म १ हजार १३१ जना नेपालीहरुलाई बहिर्गमन भीसा जारी गरेको जनाएको छ ।

साउदीको विभिन्न कम्पनी, प्रतिष्ठानहरुमा कार्यरत श्रमिकलाई साउदीको आवासीय अनुमति पत्र अकामा नबनाइदिएका वा नवीकरण नगरिदिएका नेपालीलाई स्वदेश फिर्तीमा सहजीकरण गर्दै साउदी सरकारले बहिर्गमन भिसा दिएको दूतावासले जनाएको छ ।

दूतावासका अनुसार अकामा नबनाइएका, नवीकरण नगरिएकाहरुलाई स्वदेश फिर्तीका लागि आवश्यक बहिर्गमन भिसा दिइएको हो ।

दूतावासमा झुट्टो विवरण दिएर बहिर्गमन भिसाका लागि निवेदन दिएमा र दूतावासको सिफारिस अनुसार बहिर्गमन भिसा लागेमा यसबाट सिर्जना हुने समस्याका लागि सम्बन्धित व्यक्ति स्वयं नै जिम्मेवार हुनुपर्ने दूतावासले जनाएको छ ।

बहिर्गमन भिसा लागेकाले भने स्वदेश फिर्तीका लागि तयारी गर्न दूतावासले अनुरोध गरेको छ ।