दोहा- जनउद्धार केन्द्र मलेसियाले ७ नेपालीको उद्धार गरेको छ ।

गैरकानुनी रुपमा बसोबास गरेका तथा कोरोना भाइरस नियन्त्रणका लागि लगाएको कानुन उलंघन गरेको आरोपमा पक्राउ परेका ७ नेपालीको उद्धार गरिएको हो ।

जेल जीवन बिताइरहेका र घरफिर्ती केन्द्रमा रहेका ७ जना नेपालीलाई उद्धार गरि हिमालयन एअरलाइन्सको जहाजबाट स्वदेश फर्काइएको जनउद्धार केन्द्र मलेसियाका अध्यक्ष केशु थापाले जानकारी दिए ।

थापाका अनुसार सप्तरीका अनिल कुमार रजक तथा श्याम सुन्दर सदा, गुल्मीका गंगा बहादुर बस्नेत, बाँकेका गिरिजा प्रसाद महतो, राकेश यादब र राजुनाथ योगी तथा  संखुवासभाका राजेन्द्र बहादुर सिंहलाई स्वदेश फर्काइएको हो ।

जनउद्धार केन्द्रका उपाध्यक्ष रुप बहादुर टण्डन (भरत)ले उपलब्ध गराएको सहयोग रकम र घुम्टे युवा परिवार जापानले गरेको सहयोग रकमबाट दुइ वटा टिकट खरिद गरिएको थियो ।

बाँकी टिकट सम्बन्धित ब्यक्तिहरु कार्यरत कम्पनीसँगको सहकार्यमा जनउद्धार केन्द्रको विशेष पहलमा पीडितहरुलाई उपलब्ध गराइएको टण्डनले बताए ।