कैयौं रिकुटेहरूको बीचमा
टाढैबाट छुट्टै देखिने
अनि चिनिने गरी
ठिङ्ग उभिएको छु
सतिसालझैं ढाल बनेर
म अर्थात्
एउटा पुरानो
थ्री नट थ्री राइफल ।

म एक्लै उभिएको छु
आफ्नै बलमा
आफ्नै जमिनमा
एउटा लक्ष्मण रेखा कोरेर
र यो पनि भन्दैछु
मेरो सीमा तिमी ननाघ
म पनि तिम्रो सीमा नाघ्दिनँ
म अर्थात्
कैयौ रिकुटेहरूको बीचमा
एउटा पुरानो
थ्री नट थ्री राइफल ।

तिमीलाई थाहा छ
म अनवरत प्रयोगमा छु
कहिले
बेमौसमी जुलुस भगाउन
कहिले आफ्नै बीचमा
आत्म विश्वासको साहस जगाउन
एक्लै डटिरहेको छु
अनवरत खटिरहेको छु
म अर्थात्
कैयौ रिकुटेहरूको बीचमा
एउटा पुरानो
थ्री नट थ्री राइफल ।

सहेको छु खुशीसाथ
घाम, झरी र मुसलधारे पानी
रोएर पनि खपेको छु
मुटु कमाउने जाडो
पार गरेको छु सहजै
कैयौ माईल यात्रा
तुसारोमा खाली खुट्टा हिँडेर
म अर्थात्
कैयौ रिकुटेहरूको बीचमा
एउटा पुरानो
थ्री नट थ्री राइफल ।

राइफल पुरानो हो
खिया लागेको पनि हुनसक्छ
तर
थ्री नट थ्री राइफलको
एउटै विशेषता दामे हुन्छ
अलिकति तेल लगाएर
खियाँ सफा गरेपछि
यसले काम गर्छ
अनि आफ्ना र शत्रुलाई चिन्छ
मित्र देख्दा जति ट्रिगर थिचे पनि
पड्कदै पड्कँदैन
शत्रु देख्दा गडगडाएर पडकन्छ
त्यसैले त
थ्री नट थ्री राइफल
जति पुरानो भएर पनि
आजसम्म चलेकै छ
म अर्थात्
कैयौ रिकुटेहरूको बीचमा
एउटा पुरानो
थ्री नट थ्री राइफल ।