काठमाडौं – शनिबार राति ला लिगामा रियल मड्रिडले रियल बेटिसलाई ३–२ गोल अन्तरले पराजित गरेसँगै पशिक्षक जिनेदिने जिदानले नयाँ कोसेढुङ्गा पार गरेका छन् ।

योसँगै जिदानले रियलको प्रशिक्षकको जिम्मेवारीमा टिमलाई सयौं जीत दिलाएका छन् ।

जिदानले ला लिगामा प्रशिक्षकको रुपमा रियलबाट १ सय ४७ खेलमा प्रशिक्षकको भमिका निभाएका छन् । सय जीतमा ५५ खेल रियलको घरेलु मैदानमा जिताएका छन् भने ४५ खेल अवे म्याचमा जिताएका हुन् ।

जसमा उनको टोलीले ३४२ गोल गरेको छ भने १ सय ४७ गोल खाएको छ । ला लिगामा रियललाई जिदानभन्दा बढी जीत दिलाउने प्रशिक्षक मिगुएल मुनोज हुन् । उनले २ सय ५७ खेल जिताएका छन् ।

जिदानको नेतृत्वमा सन् २०१६/१७ र २०१९/२०को सिजनमा रियललाई ला लिगाको उपाधि दिलाएका हुन् ।