दोहा – कोरोना भाइरसको जोखिम बढेसँगै कतारमा रोजगारी गुमाएर अलपत्र परेका ७ नेपालीको उद्धार गरिएको छ ।

नेपाल फर्किने प्राथमिकतामा परे पनि हवाईभाडा समेत जुटाउन नसकेका उनीहरुलाई गैर आवासीय नेपाली संघ राष्ट्रिय समन्वय परिषद कतारले उद्धार गरेको हो ।

उनीहरुलाई निशुल्क हवाई टिकट उपलब्ध गराएर स्वदेश फर्काइएको एनआरएन राष्ट्रिय समन्वय परिषद् कतारका अध्यक्ष मोहमद मुक्तदा मुसलमानले जानकारी दिए ।

उनका अनुसार कतारस्थित नेपाली दूतावासको संरक्षकत्व र सहयोगमा गैर आवासीय नेपाली संघ राष्ट्रिय समन्वय परिषद कतार र नेपाली व्यवसायी संघ कतारद्वारा पहिलो चरणमा ५५ जनाका लागि हवाई टिकट उपलब्ध गराउने निर्णय अनुसार चौथो चरणमा थप ७ जनालाई हवाई टिकट प्रदान गरिएको हो ।

चौथो चरणमा सेप्टेम्बर २५ तारिखका दिन मानसिक सन्तुलन गुमाएको धनुषाका बिनोद महरा, दुबै मृगौला गुमाएको सर्लाहीका
हसामुद्दीन लेहेरी, सुनसरीका सद्दाम खान रहेका छन् ।

यसैगरी,सिरहाका जितेन्द्र कामती,तेह्रथुमकी अमृता कान्दङ्वा, सर्लाहीका राम बाबू टमाटा र खोटाङका आश कुमार राईलाई हवाई टिकट उपलब्ध गराई नेपाल पठाइएको अध्यक्ष मुसलमानले बताए ।

स्वदेश फिर्तीका लागि सहजीकरणको भूमिका निभाउने नेपाली दूतावास र स्वदेश फिर्तीका लागि आर्थिक सहयोग तथा उद्धार समितिका सम्पूर्ण सदस्यहरुलाई अध्यक्ष मुसलमानले धन्यवाद ज्ञापन गरेका छन् ।

यसअघि पहिलो, दोस्रो तथा तेस्रो चरणमा गरी समस्यामा परेका २३ नेपालीलाई टिकट उपलब्ध गराई स्वदेश पठाइएको थियो ।