दोहा- साउदी अरवको रियादबाट काठमाडौंको लागि थप ४ वटा चार्टर  उडान हुने भएको छ।

साउदीस्थित नेपाली दूतावासले एक सूचना जारी गर्दै थप उडानका  तालिका सार्वजनिक गरेको हो।

दूतावासका अनुसार नेपाल एयरलाइन्सले सेप्टेम्बर १७, १९, २३ र २७ तारिख रियादबाट उडान गर्नेछ । उक्त मितिमा नेपाल जान इच्छुक नेपालीले टिकट लिन सक्ने दूतावासले जनाएको छ ।

नेपाल जाने यात्रुले ७२ घण्टाभित्रको पीसीआर नेगेटिभ रिपोर्ट समेत साथमा लिनुपर्ने छ ।

यात्रुले उडान समयको ७२ घण्टाभित्रको पीसीआर नेगेटिभ भएको प्रमाण र कोभिड–१९ संकट व्यवस्थापन सञ्चालन केन्द्रको वेभसाइटमा राखिएको अनलाइन इन्ट्री फारम भरेपश्चात प्राप्त हुने बारकोड वा प्रिन्ट कपी अनिवार्य रुपमा लिएर जानुपर्ने सूचनामा उल्लेख छ।

पीसीआर परीक्षण नगरी चार्टर उडानमार्फत स्वदेश फर्किने यात्रुहरुले नेपाल पुगेपछि ७ दिनसम्म आफ्नै खर्चमा होटल क्वारेन्टाइनमा बस्नुपर्ने दूतावासले जनाएको छ ।

यसघि दूतावासले सार्वजनिक गरेको उडान तालिका अनुसार नेपाल एअरलाइन्सले सेप्टेम्बर १८, १९,२०,२४ र २८ तारिखमा दमामबाट उडान गर्ने उल्लेख छ ।

यस्तै हिमालय एयरलाइन्सले सेप्टेम्बर १६,१७,२२,२६ तथा २९ मा रियादबाट उडान गर्ने तालिका यसअघि नै सार्वजनिक गरिसकेको छ ।