काठमाडौँ- सिन्धुपाल्चोकको बाह्रबिसेमा पहिरोले पुरिएर १७ वटा घर पुरिँदा बेपत्ता भएका २६ जनामध्ये ५ को शव फेला परेको छ ।

बाह्रबिसे वडा नम्बर ७ घुम्थाङको नागपुजे र भीरखर्कमा खसेको पहिरोमा १७ घर पुरिँदा २६ जना बेपत्ता भएकोमा ५ को शव फेला परेको इलाका प्रहरी कार्यालय बाह्रबिसेका प्रहरी निरीक्षक नवराज न्यौपानेले जानकारी दिए ।

घटनास्थलमा अहिले खोजी तथा उद्धार जारी रहेको छ । बेपत्ताहरू अझै सम्पर्कमा नआएकाले मृतकको संख्या बढ्न सक्ने उनले बताए ।

शनिबार राति ६ घण्टासम्म परेको भारी वर्षापछि भीरखर्कबाट पहिरो खस्दा नागपुजेमा बढी क्षति गरेको बाह्रबिसेका मेयर निमफुन्जो शेर्पाले जानकारी दिए ।

‘अहिले घटनास्थलमा उद्धार जारी छ, भीरखर्कबाट खसेको पहिरोले नागपुजे र भीरखर्का गरी १७ घरमा क्षति पुर्‍याएको छ,’ मेयर शेर्पाले भने, ‘जुमखर्कामा पनि पहिरो गएको जानकारी आएको छ विस्तृत विवरण आउन केही समय लाग्छ ।’

गृहजिल्लामा पहिरो गएपछि सभामुख अग्निप्रसाद सापकोटासहितको टोली पनि घटनास्थलतर्फ गएको छ ।