नवलपुर– नेपाली कांग्रेस नवलपुरका सचिव बालकृष्ण घिमिरे कोरोना मुक्त भएका छन् ।

मध्यविन्दु जिल्ला अस्पतालको कोभिड–१९ अस्थायी अस्पताल सामुदायिक प्राकृतिक चिकित्सालयमा उपचारपछि कोरोना मुक्त भएका घिमिरेले संक्रमितलाई हेर्ने दृष्टिकोण बदल्नुपर्ने बताए ।

अस्पतालबाट कोरोना मुक्त भएर बाहिरिँदा धेरै खुसी मिलेको भन्दै उनले संक्रमित सबैको शीघ्र स्वास्थ्य लाभको कामना गरे ।

आफैं नै सचेत बनेर समाजलाई सुरक्षित बनाउन सकिन्छ भन्दै घिमिरेले भने, ‘हामी आफू सजग रहौँ, सचेत बनौँ । यो महामारीबाट समाजलाई सुरक्षित बनाऔं । संक्रमितलाई आत्मीय व्यवहार गरौँ ।’

समाजलाई संक्रमितलाई हेर्ने दृष्टिकोण नकारात्मक भएको भन्दै उनले यो अरुलाई मात्र पर्ने समस्या नभएको बताए । ‘विश्वमा महामारीका रुपमा फैलिएको कोरोना भाइरसको संक्रमण जुनसुकै बेला जो सुकैलाई भेट्न सक्छ । हामी यसबाट अछुतो हुन्छौं भन्ने छैन् । त्यसैले सँधै सचेत रहौं,’ उनले भने, ‘जोगिँदा जोगिँदै पनि संक्रमित भइहालेमा आफूलाई समाजले कस्तो व्यवहार गरोस भन्ने लाग्छ अहिले आफूले पनि संक्रमितलाई त्यस्तै व्यवहार गर्नुपर्छ ।’

घिमिरेले मनोबल उच्च राखे सहजै कोरोनालाई जित्न सकिने बताए । उनले अब संक्रमण फैलिन नदिन र संक्रमितलाई पनि चाँडो ठीक बनाउन सबै तह र तप्काका व्यक्ति लाग्नुपर्ने बताए ।

घिमिरेसँगै सामुदायिक प्राकृतिक चिकित्सालयबाट ३३ जनाले कोरोनालाई जितेर घर फर्किएका छन् ।