काठमाडौं – नेपाली खेलकुद क्षेत्रका खेलाडीदेखि पदाधिकारीसम्म गरी हालसम्म ४६ जनामा कोरोना भाइरसको संक्रमण पुष्टि भएको छ ।

शुक्रबार नेपाल ओलम्पिक कमिटिका महासचिवसहित ३ जनामा कोरोना पुष्टि भएसँगै संक्रमीतको संख्या ४६ पुगेको हो ।

संक्रमितमध्ये सबैभन्दा बढी सशस्त्र प्रहरी बल (एपीएफ) क्लबका खेलाडी र अफिसियल रहेका छन् । जसमा २९ जना खेलाडी र ७ जना अफिसियलमा संक्रमण पुष्टि भएको बताइएको छ ।

३७ जनामध्ये ८ जना उपचारपछि डिस्चार्ज भइसकेका छन् । एपीएफका संक्रमितमा डब्लुटिफ, कराते, भलिबल, ह्यान्डबल र फुटबलका खेलाडी रहेको एपीएफ स्रोतले जानकारी दिएको छ ।

एपीएफले दक्षिण सीमा सुरक्षामा पठाएका मध्ये ३६ जनामा कोरोना देखिएको थियो। यस्तै, अन्यमा स्क्वास खेलका उपाध्यक्ष र मुख्य प्रशिक्षक रहेकामा कोरोना पुष्टि भएको छ भने नेपाल ओलम्पिक कमिटि (एनओसी) का महासचिवसहित ५ जनामा संक्रमण पुष्टि भएको छ ।

राष्ट्रिय खेलकुद परिाष्द् (राखेप) मा २०० जनाको परीक्षण गर्दा एनओसीका २ जनामा संक्रमण पुष्टि भएको हो ।

यस्तै, प्रदेश २ मा रहेका युवा क्रिकेटहरु २ जनामा पनि संक्रमण देखिएको बताइएको छ । राष्ट्रिय फुटबल टोलीका एक खेलाडीमा पनि कोरोना संक्रमण देखिएको हो ।

अहिले नेपालमा कोरोना संक्रमीतको संख्या भने ३६ हजार ४ सय ५६ जनामा पुष्टि भइसकेको छ । कोरोनाकै कारण नेपालमा १ सय ९५ जनाको मृत्यु भइसकेको छ।