काठमाडौं- आफ्नो नजिकको बजारमाभन्दा तरकारी र फलफूल सस्तो पाइने भनेर उपभोक्ता कालीमाटी जान थालेपछि कालीमाटी तरकारी तथा फलफूल बजार भीड बढेको छ ।

काठमाडौं महानगरको कृषि विभागको समन्वयमा शुक्रबार बजार अनुगमन क्रममा पनि त्यहाँ उस्ती भीडी थियो, कोरोना सन्त्रान न त ब्यापारीमा देखियो न उपभोक्तामा नै ।

आज बिहान ६ बजे बजार पुग्दा त्यहाँ मानिसहरुको भीड थियो । व्यक्ति—व्यक्ति बीचमा भौतिक दूरी ख्याल गरिएको थिएन । मानिसहरु तरकारी किन्ने र बेच्ने ध्यानमा थिए ।

कालीमाटी तरकारी तथा फलफूल विकास समितिले यस अघि नै किसान बजार बन्द गराएको थियो । त्यसको मुल ढोका बन्द थियो तर भित्रबाट पसेर व्यापारीले कारोबार गरिरहेका थिए । उपभोक्ताहरु सामान किनिरहेका थिए ।

‘निषेध आदेश जारी भएपछि नजिकका व्यापारीले महङ्गो बनाए । तरकारी आएको छैन भन्छन् । घर नजिक एक किलो गोलभेडा किन्ने पैसाले यहाँ एक धार्नी नै पाइने रहेछ,’  एक उपभोक्ता भन्दै थिए, ‘हामीसँग चाहिँ सस्तो पैसा कहाँ छ र ?

अनुगमनका क्रममा थोक बजारभित्रका स्वास्थ्य सुरक्षा मापदण्ड पालना भए नभएको अवलोकन गरिएको थियो ।

त्यस्तै ढक तराजुको अवस्था, खरिद बिक्री बिल, मूल्य सूची, परिचय पत्रलगायत सूचकका आधारमा अनुगमन गरिएको थियो ।

कृषि विभागका प्रमुख हरिबहादुर भण्डारीकाअनुसार मुल्य, र गुणस्तरका आधारमा अवस्था बिग्रिएको छैन, तर जति हुनु पर्ने हो त्यति सुधार भएको छैन ।

‘व्यापारी र उपभोक्तामा महामारीको कति पनि डर देखिएन । यो बजारको मुल्य अस्थिर छैन । हामीले यहाँको मुल्य लिएका छौं, यसैका आधारमा बाहिरको मूल्य दाँजेर नियमन गर्छौं, ‘ भण्डारीले भने ।

समितिका कार्यकारी निर्देशक बिनोककुमार भट्टराई भन्छन्- ‘जनजीवन सहज बनाउन तरकारी बजार नियमित गर्नु पर्ने आवश्यकता छ । तर, व्यापारको चक्रमा व्यक्तिले स्वास्थ्य सुरक्षा सतर्कता नअपनाउँदा समस्या भएको छ ।’

‘कालीमाटीमा जुन मुल्यमा सामान पाइन्छ । त्यही सामानको मूल्य बाहिर शतप्रतिशत धेरै हुने भएपछि यस्तो अवस्था आएको हो’, उपभोक्ता अनुसन्धान मञ्चका अध्यक्ष माधव तिमिल्सेनाले भने, ‘व्यापारमा खरिद र बिक्री बिललाई अनिवार्य गर्ने, त्यसका आधारमा मुल्य सूची टाँस्ने, मूल्य सूचीका आधारमा उपभोक्ताले खरिद गर्ने हो भने समस्या कम हुन्छ ।’

कालीमाटी बजार बिकास समितिले भदौ ७ गते विकास समितिले दुई पाङ्ग्रे सवारी साधनलाई बजार प्रवेशमा रोक लगाउने, किसान बजार बन्द गर्ने, बजारमा कार्यरत भरिया र मजदुरलाई समूहमा बस्न निरुत्साह गर्नेलगायत ११ बुँदे सूचना जारी गरेको थियो ।

यो सूचनाको पालनामा पनि समस्या देखियो । सूचनामा इजाजत प्राप्त व्यवसायीले २ जनाभन्दा बढी बस्न नपाइने, बजार प्रवेश गरेपछि साबुन पानीले हात धुनु पर्ने, मास्कको प्रयोग गर्नुपर्ने, कृषि उपज लिएर आउने सवारीले बिहान ९ बजेदेखि राति ११ बजेसम्म मात्र प्रवेश गर्न पाउने, सामान जुन अवस्थामा आएको छ, त्यही अवस्थामा बिक्री गर्ने लगायत बिषय उल्लेख गरिएको थियो ।

दैनिक औसतमा ५ सय मेट्रिक टन तरकारी तथा फलफूल बिक्री हुने यस बजारमा ४५२ वटा थोक, ६५ वटा खुद्रा र २७ वटा माछा पसल छन् । बजारमा सरकारले जारी गरेको स्वास्थ्य मापदण्ड पालना गराउन कठिन भएको छ ।