एजेन्सी – अमेरिकी जासुसी विमान आफ्नो भू-भागमा प्रवेश गरेर सैन्य गतिविधी रेकर्ड गरेको चीनले दाबी गरेको छ ।

दुई अमेरिकी जासुसी विमान आफ्नो सीमामा घुसेर सैन्य अभ्यास गोप्य रुपमा रेकर्ड गरेको चीनले दाबी गरेको छ ।

अमेरिकी जासुस विमानले उत्तरी चीनको सीमा क्षेत्रमा भएको आफ्नो सैन्य अभ्यासलाई रेकर्ड गराएको दाबी गर्दै उसले अमेरिकी सेनाको उक्त गतिविधि सैन्य झडपका लागि कारक हुन सक्ने चेतावनी दिएको छ ।

‘गत महिना २ अमेरिकी लडाकू विमान संघाईबाट ७५ किलोमिटरको दूरीमा उडान भरिरहेका दृष्यहरु समेत देखिएका छन्,’ चिनिया रक्षा मन्त्रालयका प्रवक्ता वू किनले भने, ‘हाम्रो सेनाका बारेमा थुप्रै घण्टा (रेकर्ड) जासुसी गरेका छन् । यसले हाम्रो सैनिक प्रशिक्षणलाई असर गरेको छ । अमेरिकाले दुई देशबीचको सम्झौता समेत उल्लंघन गरेको छ ।’

अमेरिकाले त्यहाँ प्रयोग गरेको विमान यु–२ पहिलोपटक सन् १९५० पछि देखापरेको बताइएको छ ।

यी विमानले चिनियाँ क्षेत्रमा ७० हजार फिटमाथिबाट रेकर्ड गरेको आरोप लागेको छ । अमेरिकाले भने चिनियाँ आरोपको खण्डन गरेको छैन । सिएनएनसँगको कुराकानीमा यूएस एयरफोर्सका एक अधिकारीले आफूहरू नियममा बसेर काम गरिरहेको बताएका छन् ।