कास्की- कास्कीमा निषेधाज्ञा अवधि ५ दिन थपिएको छ । कोरोना भाइरस संक्रमित बढेसँगै निषेधाज्ञाको अवधि भदौ १२ गतेसम्मका लागि लम्ब्याइएको हो ।

कास्कीका प्रमुख जिल्ला अधिकारी ज्ञानप्रसाद ढकालले आइतबार निषेधाज्ञा आदेश जारी गर्दै भदौ १२ गते राति १२ बजेसम्म कायम रहने जानकारी दिएका हुन् । यस अघि पाँच दिनका लागि भदौ २ देखि निषेधाज्ञा जारी गरिएको थियो ।

पुनः थपिएको निषेधाज्ञा अवधिमा अत्यावश्यक कामबाहेक घरबाहिर निस्कन र हिँडडुल नगर्न भनिएको छ ।

यस अवधिमा निर्माण कार्य तथा उद्योगहरू सञ्चालनमा पनि बाधा नपुग्ने निषेधाज्ञा आदेशमा उल्लेख छ । निर्माणसँग सम्बन्धित सामग्री बिक्री गर्ने पसलहरू भने साँझ ५ देखि ७ बजेसम्म खोल्न पाइने छ ।

खाद्यान्न, फलफूल, तरकारी, माछा मासु दूध डेरीजन्य पसल बिहान ५ देखि ८ र साँझ ५ देखि ७ सम्म खोल्न सकिने जनाइएको छ ।