दोहा : बैदेशिक रोजगारीमा जाने अधिकाम्स नेपाली श्रमिक दलालबाट ठगिने गरेको गुनासो आइरहेको बेला बेलायत पठाइदिने भन्दै युएई लगेर अलपत्र परेका दुई २ नेपालीलाई दलालले कुटपिट गरेका छन् ।

राम्रो कमाई हुने प्रलोभन देखाएर दलाललाई ठूलो रकम बुझाएर नेपालबाट मनोहर केसी र टीकाराम बोहोरा बेलायत हिडे तर उनीहरुलाई बेलायत नभई यूएईमा पुर्‍याएर अलपत्र परियो ।

आफूहरु अलपत्र पारेको तथा न्याय माग्दा उल्टै दलालबाट कुटिएको पीडित बोहोराले बताए । एक महिना तालिम लिएपछि बेलायत पठाईदिने भन्दै आफूहरुलाई यूएई ल्याइएको उनले बताए ।

बेलायत नपठाएसम्म युएईमै काम लगाईदिने भन्दै दलाल श्याम थापाले उनीहरुलाई आश्वासन दिएका थिए । उनले भनेअनुसारको काम नभएपछि गुनासो गर्दा उल्टै कुटपिट भएको बताए । बोहोराले भने, ‘हामीलाई भनिए अनुसारको केहि पनि भएन । हामीले न्याय माग्दा हामीलाई ठग्नेले उल्टै कुटे । हामी अब न्यायको खोजीमा छौँ ।’

कुटपिटपछि दलाल थापा फरार रहेको भन्दै पीडितहरुले युएईस्थित नेपाली दूतावास तथा एनआरएन युएईमा उद्दारको लागि निवेदन दिएको बोहोराले बताए ।

उनीहरु जस्तै थापाले अन्य ६३ जना नेपालीसँग पनि बेलायत पठाईदिने भन्दै भनेर प्रति व्यक्ति ९ देखि १० लाखसम्म लिएको पीडितहरुले बताएका छन् ।