अमेरिकाले क्युबामा तेल पैठारी गर्ने भेनेजुएलाको गतिविधिलाई लक्षित गरी नाकाबन्दीको घोषणा गरेको छ ।

अमेरिकाको अर्थमन्त्रालयले गत फेब्रुअरी र मार्च महिनामा क्युबामा तेल पैठारी गरेको भन्दै भेनेजुएलाको राज्यसञ्चालित तेल कम्पनी पीडीभीएसए र राज्यले सञ्चालन गर्ने ३४ पानीजहाज तथा दुई कम्पनी र कम्पनीको एक अर्को पानीजहाजमा नाकाबन्दीको घोषणा गरेको हो ।

अमेरिकाको अर्थमन्त्रालयले भेनेजुएलामा निकोलस मादुरोको अवैधानिक सत्ताका लागि जीवनरेखाको काम गर्ने पानीजहाज र कम्पनीमाथि नाकाबन्दी लगाएको अमेरिकी अर्थमन्त्री स्टिभन मन्युचिनले जनाएका छन् ।

भेनेजुएलाको तेल आयात गरी क्युबाले फाइदा उठाइरहेको र भेनेजुएलामा मादुरोको सरकारलाई सहयोग गर्दै आएकाले पछिल्लो नाकाबन्दी घोषणा गरिएको अमेरिकी भनाइ छ ।

नाकाबन्दीको औपचारिक घोषणा हुनुअघि हुस्टन टेक्सासमा आयोजित एक ¥यालीलाई सम्बोधन गर्दै अमेरिकी उपराष्ट्रपति माइक पेन्सले पछिल्लो नाकाबन्दीबारे खुलासा गरेका थिए ।

अमेरिकाले गत जनवरी २३ मा आफूले आफैँलाई राष्ट्रपति घोषणा गरेका भेनेजुएलाका विपक्षी नेता हुआँ गुआइदोलाई समर्थन गर्दै आएको छ भने सत्तामा रहेका निकोलस मादुरोलाई अवैधानिक घोषणा गर्दै मादुरोको सत्ताविरुद्ध विभिन्न कदमहरु चाल्दै आएको छ ।