काठमाडौं – प्रथम अध्यक्ष तथा प्रधानमन्त्री केपी शर्मा ओलीको सहभागिता विनै सत्तारुढ नेपाल कम्युनिष्ट पार्टी (नेकपा) को स्थायी कमिटी बैठक प्रधानमन्त्री निवास बालुवाटारमा परिसरमा सुरु भएको छ ।

प्रथम अध्यक्ष ओलीले स्थगन गरेको आजको बैठक अर्का अध्यक्ष पुष्पकमल दाहाल प्रचण्डले आफ्नो अध्यक्षतामा सुरु गरेका हुन् । यसअघि प्रचण्ड र वरिष्ठ नेता झलनाथ खनालले केही बेर ओलीलाई भेटेका थिए ।

एक सदस्यले बैठकमा बहुमत सदस्य सहभागी रहेको बताए । ओली पक्षका एक नेताले भने केही सदस्यहरु बैठक कक्षमा रहेको भन्दै बैठक सुरु भएको र त्यहाँ बहुमत सदस्य उपस्थित रहेको भन्ने कुरा अस्वीकार गरे ।

बैठकमा २७ जना स्थायी समिति सदस्यहरुको उपस्थिति रहेको ती सदस्यले बताए । ती सदस्यका अनुसार महासचिव विष्णु पौडेल र उपाध्यक्ष वामदेव गौतम पनि बैठकमा उपस्थित भएका छन् ।

लामो समयदेखि नेकपाभित्र विवाद चर्किँदै गएको छ । विवादका कारण पटक–पटक बस्ने भनिएको स्थायी कमिटी बैठक सर्दै आएको थियो ।

मंगलवार (आज) पनि प्रधानमन्त्री ओलीले प्रचण्डसहित कुनै पनि नेतासँग छलफल नगरी बैठक स्थगित गरेका थिए ।

केही समययता प्रचण्डलगायत शीर्ष नेताहरुले प्रधानमन्त्री र अध्यक्ष पदबाट ओलीको राजीनामा मागेपछि नेकपाभित्र विवाद चर्किएको छ ।