काठमाडौं– काठमाडौं– कानून व्यवसायीहरुको छाता संगठन नेपाल बार एशोसिएशनको नयाँ नेतृत्वका लागि भएको निर्वाचनमा प्रगतिशील समूहका चण्डेश्वर श्रेष्ठ विजयी भएका छन् ।

नेकपा निकट प्रगतिशील, पेशागत तथा समावेशी समूहका तर्फबाट अध्यक्षका उम्मेदवार श्रेष्ठले ४०२२ मत ल्याइ विजयी भएका हुन् । उनका निकटतम प्रतिद्वन्द्वी लोकतान्त्रिक प्यानलका सुनिल पोखरेलले ३८७३ मत प्राप्त गरेका छन् ।

महासचिवमा भने लोकतान्त्रिक समूहका लीलामणि पौडेल ४ हजार १ सय ७८ मतका साथ विजयी भएका छन् । प्रगतिशीलतर्फका महासचिवका उम्मेदवार सुरेन्द्रबहादुर थापाले भने ३ हजार ७ सय १ मत प्राप्त गरेका छन् ।

त्यसैगरी प्रगतिशील समूहकै तर्फबाट कोषाध्यक्षमा रुद्रप्रसाद पोखरेल ४ हजार ४६ र महिला उपाध्यक्षमा रक्षा बस्याल ३ हजार ९ सय ४७ मतका साथ विजयी भएका छन् ।

२५ सदस्यीय कार्य समितका लागि भएको चुनावमा नेकपा निकट प्रगतिशील, पेशागत तथा समावेशी समूहका तर्फबाट २२ सिटमा जित हासिल भएको छ ।

लोकतान्त्रिक प्यानलका तर्फबाट महासचिव र प्रदेश ५ का उपाध्यक्ष विजयी भएका छन् । त्यसैगरी मधेसी मुस्लिममा उपत्यका बाहिरबाट खुला सदस्य तर्फ मनोज कुमार चौधरी विजयी भएका छन् ।

नयाँ कार्यसमितिका लागि गत शनिबार बिहान ८ देखि अपराह्न ४ बजेसम्म देशभरिका ३५ मतदान केन्द्रमा निर्वाचन भएको थियो । एक अध्यक्ष, एक महासचिव, एक कोषाध्यक्ष, एक महिला उपाध्यक्ष र सातै प्रदेशबाट एक एक गरी आठ उपाध्यक्ष तथा १४ केन्द्रीय सदस्यका लागि निर्वाचन भएको हो ।

२५ सदस्यीय कार्यसमितिको लागि ६३ जनाले उम्मेदवारी दर्ता गराएका थिए । निर्वाचनमा देशभर बारका १० हजार ३१३ मतदातामध्ये ८ हजार ३२९ मतदाताले मतदान गरेका थिए ।