काठमाडौं- प्रधानमन्त्री निवास बालुवाटरमा अहिले विपद् व्यवस्थापन समितिको बैठक जारी छ । बैठकमा प्रधानमन्त्री केपी शर्मा ओली, प्रमुख प्रतिपक्षी दल नेपाली कांग्रेसका सभापति शेरबहादुर देउवालगायतका नेता सहभागी छन् ।

मनसुन सुरु भएसँगै देशभर बाढी पहिरोले पुर्‍याएको क्षति र जोखिम न्यूनीकरण गर्न चाल्नुपर्ने कदमका विषयमा छलफल जारी रहेको प्रधानमन्त्रीका प्रेस सल्लाहकार सूर्य थापाले जानकारी दिए ।

बैठकमा सहभागीहरुले विपदमा परेकाहरुलाई तत्काल उद्धार, राहत र व्यवस्थापनको काम चुस्त बनाउन प्रधानमन्त्री ओलीलाई सुझाव दिएका छन् ।

परिषदको बैठकपछि प्रधानमन्त्री ओलीले मन्त्रिपरिषदका सदस्यहरुलाई छलफलका लागि बालुवाटार बोलाएका छन् ।

पछिल्लो एक हप्तादेखि देशभर अविरल रुपमा परेको बर्षासँगै आएको पहिरोले ठूलो जनधनको क्षति भएको छ। शुक्रबारमात्रै देशभरमा २६ जनाको मृत्यु हुनुका साथै ४१ जना बेपत्ता रहेका छन्।