काठमाडौं – नायिका स्वस्तिमा खड्काले निर्माता तथा निर्देशक युवराज लामाको अभिव्यक्तिप्रति विरोध जनाएकी छिन् । उनले सामाजिक सञ्जाल फेसबूकमा एक स्टाटस लेख्दै लामाको अभिव्यक्तिप्रति असहमति जनाउँदै अपमानजनक भएको टिप्पणी गरेकी हुन् ।

निर्मातासमेत रहेका युवराज लामाले अभिनेता भुवन केसीलाई समर्थन गर्दै कसैले अंकमाल गर्‍यो, गाला छायो भनेर रुनुको अर्थ नभएको बताएका थिए । उनले अन्तर्वार्तामा चलचित्र क्षेत्रमा यस्तो भइरहने भनेका थिए ।

लामाको यो भनाइप्रति स्वस्तिमाले असहमति प्रकट गरेकी हुन् । उनले सामाजिक सञ्जालमा लेखेकी छिन् – चलचित्र क्षेत्रको जिम्मेवार र वरिष्ठ व्यक्तिले यस्तो भन्नु दुखद कुरा हो ।

कसैलाई छुने, चुम्बन गर्ने, जबरजस्ती तान्ने जस्तो व्यवहार शारीरिक दुर्व्यवहार भएको र यस्तो दुर्व्यवहार सह्य नहुने स्वस्तिमाले बताएकी छिन् ।

स्वस्तिमाले हिरोइन भएर यति त सहनुपर्छ भन्नु अपमानजनक भनाइ भएको बताएकी छिन् । युवराज लामाले अन्तर्वार्ताका क्रममा हिरोइन भएपछि यति त सहनुपर्छ भन्ने आशयको अभिव्यक्ति दिएका थिए ।

केही दिनअघि नायिका साम्राज्ञी राज्यलक्ष्मी शाहले अभिनेता भुवन केसीले आफूमाथि घिनलाग्दो व्यवहार गरेको आरोप लगाएकी थिइन् ।

नेपाली फिल्म उद्योगमा कलाकारले कलाकारलाई गर्ने व्यवहारलाई लिएर बहस सिर्जना भइरहेका बेला युवराज लामाको उक्त अभिव्यक्ति सार्वजनिक भएको थियो ।