काठमाडौं– युवा तथा खेलकुद मन्त्रालयले एन्टी डोपिङ एप सार्वजनिक गरेको छ ।

नयाँ युग अनुसार नेपाली खेलकुदका कार्यक्रम, खेलाडीले सहभागीता जनाएका राष्ट्रिय तथ अन्तर्राष्ट्रिय प्रतियोगिताहरुको दस्तावेज समेत रहने गरी मन्त्रालयले एप सार्वजनिक गरेको हो ।

लामो समयको गृहकार्य पछि एप्स सार्वजनिक गरिएको युवा तथा खेलकुद मन्त्री जगत बहादुर विश्वकर्माले बताए ।

‘यसका लागि हामीले लामो समय गृहकार्य गरेका छौं । अहिलेसम्म नेपालले सहभागता जनाएका अन्तर्राष्ट्रिय प्रतियोगिता र खेलाडीका पदकहरु समेत एप्समा समेटिएको छन्,’ मन्त्री विश्वकर्माले बताए ।

एप निर्माणमा जुटेको प्राविधिक टोलीले एप इन्टरनेटविना पनि खुल्ने र भित्र रहेका कन्टेन्टहरु खुल्ने बताइएको छ ।

एपमा खेलाडीको अन्तर्राष्ट्रिय  सहभागिता, खेलाडीका राष्ट्रिय तथा अन्तर्राष्ट्रिय कीर्तिमान, राष्ट्रियदेखि अन्तर्राष्ट्रिय खेल गतिविधि लगायतका दस्तावेज समावेश गरिएको बताइएको छ ।

एप म्याराथन धावक बैकुण्ठ मानन्धरको प्रोमो भिडियो बजाउँदै सार्वजनिक गरिएको थियो ।

१३ औं दक्षिण एसिायली खेलकुद आयोजना गर्दाको अनुभव सुनाउँदै मन्त्री विश्वकर्माले भने, ‘साग यसअघि पनि नेपालमा आयोजना गरिएको थियो । तर, ती प्रतियोगिताहरुको कुनै पनि दस्तावेज फेला पार्न सकिएन । अब यो एपमा सबै खेलकुद गतिविधिहरु दस्तावेजका रुपमा समेत रहनेछन् ।’

‘वर्ल्ड एन्टी डोपिङ एजेन्सी’ ले बर्जित गरेका औषधिहरुको सूची समेत एपमा रहेने हुँदा यसको नाम नै एन्टी डोपिङ एप राखिएको जनाइएको छ ।