काठमाडौं – राष्ट्रिय खेलकुद परिषद् (राखेप)ले आफ्नो प्रतिनिधिका रुपमा छुम्बी लामा र धर्मराज गिरीलाई नेपाल क्रिकेट संघ (क्यान)को सदस्यका लागि सिफारिस गरेको छ ।

मंगलबार राखेप सदस्य सचिव रमेश कुमार सिलवालले लामा र गिरी दुवै जनालाई सिफारिस पत्र पठाएका हुन् ।

योसँगै क्यानको कार्यसमितीले ९ महिनापछि पूर्णता पाएको छ । राष्ट्रिय खेलकुद परिषद्को कोटाबाट मनोनित हुने दुई जनाको नाम परिषद्ले पठाएपछि क्यानको कार्यसमितीले पूर्णता पाएको हो ।

छुम्बी लामालाई पूर्व सदस्यसचिव युवराज लामाको पालामा क्यानको अध्यक्ष बनेका टंक आङबुहाङले क्यानमा प्रवेश गराएका थिए ।

क्यानकी पूर्व सीईओ भावना घिमिरेको पालामा लामा चिफ अपरेटिङ अफिसर भएर काम गरेका थिए ।

अर्का सदस्य गिरी भने मदनभण्डारी फाउण्डेसनको क्रिकेट विभागका उपाध्यक्ष हुन् ।