काठमाडौं – स्पेनिस ला लिगामा गेटाफेले रियल सोसियाडलाई पराजित गरेको छ ।

गेटाफेको घरेलु मैदानमा भएको खेलमा पाहुना टोली रियल सोसियाड २–१ गोल अन्तरले पराजित भएको हो ।

जीतसँगै शीर्ष पाँच स्थानमा रहेको गेटाफेले अर्को सिजनको च्याम्पियन्स लिगमा छनोट हुने सम्भावना कायमै राखेको छ ।

पछिल्लो ५ खेलमा लगातार हारेको गेटाफेले सोमबार राति सोसियाडविरुद्ध भने जीत निकालेको छ । यो जीतले उसको  च्याम्पियन्स लिगमा छनोटको सम्भावना कायम राखेको हो ।

खेलको पहिलो हाफमा गेटाफले १–० गोलको अग्रता बनाएको थियो । खेलको २० औं मिनेटमा जेइमे मेटाले गोल गर्दै टिमलाई अग्रता दिलाएका थिए ।

यस्तै, खेलको ५५ औं मिनेटमा रियल सोसियाडका एड्नान जानुजाजले पहिलो गोल फर्काउँदै खेल १–१ गोल बराबरीमा रोकेका थिए ।

बराबरीमा रहेको खेलको ८३ औं मिनेटमा मेटाले व्यक्तिगत दोस्रो गोल गर्दै खेलमा गेटाफे २–१ गोलको अग्रता बनाएको थियो । मेटाको उक्त गोल निर्णायक बनेपछि सोसियाड पराजित हुन पुगेको हो ।

जीत हात पारेको गेटाफे ३२ खेलबाट ५२ अंकसहित लिगको पाँचौं स्थानमा छ भने पराजित रियल सोसियाड समान खेलमा ४७ अंकसहित ७ औं स्थानमा रहेको छ ।