काठमाडौं- सुदूरपश्चिम प्रदेश सरकारले सलह किरा मारेर ल्याउने व्यक्तिलाई प्रति किलो २५ रुपैयाँ दरले पैसा दिने निर्णय गरेको छ ।

भूमि व्यवस्था कृषि तथा सहकारी मन्त्रालयका प्रवक्ता खगेन्द्र प्रसाद शर्माले सुदूरपश्चिममा सहल किराको प्रभाव नदेखिए पनि पूर्व सावधानी अपनाउँदै यस्तो निर्णय गरिएको जानकारी दिए ।

उनले अहिलेसम्म सुदूरपश्चिम प्रदेशमा सहलको प्रभाव नपरेको जानकारी दिए यदि सलहको प्रकोप देखिएमा मारेर ल्याउनेलाई प्रति किलो २५ रुपैयाँ दिने निर्णय गरिएको बताए ।

मन्त्रालयले कृषि विकास निर्देशनालयको नेतृत्वमा तीव्र उद्धार समिति समेत गठन गरेको छ । उक्त समितिको सिफारिसमा सलह मारेर ल्याएमा प्रति किलो २५ रुपैयाँ दिने निर्णय भएको प्रवक्ता शर्माले बताए ।

शनिबारबाट नेपालमा प्रवेश गरेको सलह नियन्त्रणका लागि यसअघि प्रदेश ५ ले पनि एक किलो सलह समाते २० रुपैयाँ दिने निर्णय गरेको थियो ।

बारा, पर्सा, रौतहट, रुपन्देही लगायतका तराईका जिल्लामा शनिबार विहान देखा परेको सलह पाल्पामा समेत देखिएको जनाइएको छ ।