एजेन्सी- बलिउड अभिनेता सुशान्त सिंह राजपूतकाे मृत्युका विषयमा भारतीय प्रहरीले अनुसन्धान जारी राखेको छ ।

राजपूतले आत्महत्या गरेकाे भनिए पनि उनको के कारणले मृत्यु भएको हो यसबारे प्रहरी अनुसन्धान जारी राखेको हो ।

घटनाको प्रहरीले अनुसन्धान गरिरहँदा उनको मृत्यु प्रकरणलाई लिएर नायिका रिया चक्रवर्तीविरुद्ध उजुरी दर्ता भएकाे छ।

उनी सुशान्तकी नजिककी साथी हुन्। रियाले सुशान्तलाई आत्महत्या गर्न उक्साएकाे आराेप लगाइएकाे छ। रियाले गत शनिबार सीजेएम अदालतमा आफ्नाे याचिका दायर गरेकी छन्। यस विषयमा २४ जुनमा सुनुवाइ हुनेछ।

यसअघि पनि सुशान्त मृत्यु प्रकरणलाई लिएर  बलिउड अभिनेता सलमान खान, निर्माता तथा निर्देशकहरू करन जोहर, एकता कपुर तथा सञ्जयलीला भन्सालीसहित आठ जना विरूद्ध फौजदारी मुद्दा परिसकेको छ ।

गत बुधबार एक वकिलले उनीहरूलाई अभिनेता  राजपुतको मृत्युको कारण भन्दै बिहार अदालतमा मुद्दा दायर गरेको भारतीय सञ्चारमाध्यमले जनाएका छन् ।

टाइम्स अफ इन्डियाका अनुसार वकिल सुधिर कुमार ओझाले सलमान, करनसहित आठ जनाका विरूद्ध मुद्दा दायर गरेका हुन्। अदालतले आगामी जुलाई ३ को सुनुवाइ मिति तोकेको जनाइएको छ।

ओझाले दायर गरेको मुद्दामा आदित्य चोपडा, साजिद नाडियडवाला, भुषण कुमार र निर्देशक दिनेशको पनि नाम छ।

टाइम्स अफ इन्डियाका अनुसार यी आठ व्यक्तिले सुशान्तका फिल्म रिलिज हुन बाधा पैदा गरेको र यिनीहरूकै कारण सुशान्तलाई फिल्मी कार्यक्रमहरूमा पनि बोलाउन छाडिएको मुद्दामा उल्लेख गरिएको छ ।

केही दिन अघि अभिनेता सुशान्तसिंह मुम्बईस्थित आफ्नै फ्ल्याटमा मृत भेटिएका थिए।