काठमाडौं- उपप्रधानमन्त्री एवं कोभिड–१९ संकट व्यवस्थापन सञ्चालन केन्द्र (सीसीएमसी) निर्देशक समितिका संयोजक ईश्वर पोखरेलले कोरोनाको रोकथाम, नियन्त्रण र उपचारका लागि भएको खर्च विवरण छिट्टै सार्वजनिक गरिने बताएका छन् ।

शुक्रबार प्रेस वक्तव्य जारी गर्दै मन्त्री पोखरेलले सरकारबाट समग्र खर्चको फाँटवारी छिट्टै सार्वजनिक हुने जानकारी दिएका हुन् ।

सरकारका तर्फबाट विभिन्न शीर्षकमा निकासा भएको, प्रदेश सरकार र स्थानीय तहले पनि आफ्ना कोषबाट कोरोनाविरुद्ध खर्च गरेको समग्र फाँटवारी छिट्टै सार्वजनिक हुने वक्तव्यमा जनाइएको छ ।

उनले कोरोना संक्रमणको उच्च जोखिम रहेकोप्रति गम्भीर र संवेदनशील हुन आग्रह गरेका छन् ।

पोखरेलले विभिन्‍न मागसहित भइरहेको सडक आन्दोलनप्रति गम्भीर ध्यानाकर्षण भएको जनाउँदै संवेदनशील हुन आग्रह गरेका छन् ।

उनले कोरोना संक्रमण पछिल्लो समयमा बढ्दै गइरहेकोले विभिन्न क्षेत्रबाट प्राप्त सुझावका आधारमा यसविरुद्धको योजना थप प्रभावकारी बनाउन सरकार प्रतिबद्ध रहेको भन्दै पीसीआर परीक्षणको दायरा बढाउँदै लगिएको पनि उल्लेख गरेका छन् ।

एक महिनायता विदेशबाट भित्रिने नेपालीको संख्या ह्वात्तै बढेकाले क्वारेन्टाइनको व्यवस्थापनमा समस्या भएको उनले बताएका छन् ।