काठमाडौं- समाजवादी पार्टीकी सांसद सरिता गिरीलाई कारबाहीको माग राख्दै विरोध प्रदर्शन भएको छ ।

नेपालको राष्ट्रियता, सीमा र सरकारले जारी गरेको नयाँ नक्सालाई लिएर विवादित र आपत्तिजनक अभिव्यक्ति दिएका कारण उनीमाथि कारबाहीको माग गरिएको हो ।

युवाहरुले कारबाहीको माग राख्दै उनको घरबाहिर बुधबार नाराबाजी समेत गरेका छन् । उनीहरुले कालो झण्डा प्रदर्शन गर्दै सांसद गिरीविरुद्ध नाराबाजी गरेका छन् ।

निशान छापमा नयाँ नक्सा समेट्न सरकारले ल्याएको संविधान संशोधन विधेयकमाथि संशोधन प्रस्ताव दर्ता गराएपछि उनकै पार्टीले समेत कारबाहीको चेतावनी दिएको छ । संशोधन प्रस्ताव फिर्ता नलिए कारबाही गर्ने जनाएको छ ।

समाजवादी पार्टीका प्रमुख सचेतक उमाशंकर अडगरियाले संशोधन प्रस्ताव फिर्ता नलिए सांसद गिरीलाई कारबाही गर्ने चेतावनी दिएका हुन् ।

उनले भने, ‘हामीले दललाई नसोधिकन दर्ता गराएको संशोधन प्रस्ताव फिर्ता लिन निर्देशन दिएका छौं, फिर्ता नभए पार्टीका तर्फबाट कारबाही गर्छौं ।’

सांसद गिरीले राष्ट्रियताजस्तो संवेदनशील विषयमा संसद, सामाजिक सञ्जाल लगायतबाट लगातार आपत्तिजनक अभिव्यक्ति दिँदै आएकी छन् ।

यसैगरी विपक्षी कांग्रेसको भातृ संस्था तरुण दलले पनि सांसद गिरीलाई तत्काल पदमुक्त गर्न माग गरेको छ ।

बुधबार एक प्रेस विज्ञप्ति जारी गर्दै तरुण दलले सांसद गिरीले मुलुकको स्वतन्त्रता, राष्ट्रिय अखण्डता, स्वाभिमान, राष्ट्रिय एकता विरुद्ध अभिव्यक्ति दिएको भन्दै तत्काल कारबाहीको माग गरेको हो ।

सांसद सरिता गिरीले आफनो पदीय मर्यादाविपरीत नेपालका भूमिहरु लिपुलेक, लिम्पियाधुरा र कालापानीलाई नेपालका होइनन् भनेर दिएको अभिव्यक्तिप्रति आफ्नो गम्भीर ध्यानआकर्षण भएको तरुण दलले जनाएको छ ।