रौतहट- रौतहटमा अवैध लागुऔषध गाँजासहित चार जना पक्राउ परेका छन् । देवाही गोनाही नगरपालिका–८ गोनाही चोकबाट २० किलो लागुऔषध गाँजासहित ४ जना पक्राउ परेका हुन् ।

पक्राउ पर्नेहरुमा मकवानपुर हेटौंडा उपनगरपालिका–११ थानाभर्‍याङ बस्‍ने २७ वर्षीय निरज लामा, कैलास गाउँपालिका–९ कुमलटार बस्‍ने २८ वर्षीय बिसाल लामा, हेटौंडा उपमहानगरपालिका–१२ पदम पोखरी बस्‍नेहरु सागर लामा र अंकित लामा रहेका छन् ।

इलाका प्रहरी कार्यालय देवाही गोनाही रौतहटबाट खटिएको प्रहरीले मौलापुरबाट जयनगरतर्फ जाँदै गरेको बा.६४ प ९३०७ र ना.४५ प ६३९८ नम्बरको मोटरसाइकललाई जाँच गर्दा मोटरसाइकलमा सवार उनीहरु ४ जनाको साथमा ४ वटा झोलामा रहेको उक्त लागुऔषध गाँजा फेला पारी पक्राउ गरेको हो ।