काठमाडौं– ललितपुरको बालकुमारीमा रहको रक्तसञ्चार केन्द्र काठमाडौंको ताहचलमा सरेको छ । नेपाल रेडक्रस सोसाइटीद्वारा सञ्चालित केन्द्रले आइतबार (आज) देखि ताहचलबाटसेवा शुरु गरेको हो । सेवाग्राहीको सुविधालाई ध्यान दिँदै केन्द्र नयाँ ठाउँमा सारेको सोसाइटीका अध्यक्ष सञ्जीव थापाले जानकारी दिए ।

विसं २०२० भदौमा स्थापना भएको सोसाइटीले विसं २०२३ देखि रक्तदान कार्यक्रम सञ्चालनमा ल्याएको थियो । रगत जमा गर्ने बैंकका रुपमा विकास गरिएको रक्तसञ्चार केन्दले हाल देशका विभिन्न ७३ जिल्लामा सञ्जाल विस्तार गरी १०८ कार्यालयमार्फत सेवा प्रदान गरेको जनाएको छ ।

केन्द्रका १६ कार्यालयमा रगतको प्लाज्मा विकास गर्न सक्ने जनशक्ति तथा सेवा सञ्चालन गरिएको छ । केन्द्रका निर्देशक डा मनिता राजकर्णिकारले केन्द्रले देशभर वार्षिक तीन लाख ४४ हजार ९३३ पिन्ट रगत वितरण गरेको जानकारी दिइन् ।

सोसाइटीका कार्यकारी निर्देशक उमेशप्रसाद ढकालले सेवा प्रवाह गर्ने विषय संवेदनशील भएको बताउँदै यस क्षेत्रमा राम्रो र गुणस्तरीय सेवा प्रदान गर्न केन्द्रीय कार्यालयमा करीब एक करोड ७६ लाखको लागतमा भवन निर्माण, फर्निचर व्यवस्थापन र केही प्रविधि थप गरिएको जानकारी दिए । केन्द्रले दाताले निःशुल्क उपलब्ध गराएको रगत बिरामीलाई पनि निःशुल्क प्रदान गर्ने लक्ष्य लिएको छ ।