काठमाडौं- नेपाली कांग्रेसका नेता गगन थापाले संविधान संशोधनसँगै नेपालको परिवर्तित नक्सासहितको नेपालको निशान छाप समावेश गर्न सरकारले संसदमा दर्ता गरेको संशोधन प्रस्ताव सर्वसम्मत द्रुतगतिमा पारित गर्नुपर्ने बताएका छन् ।

उनले यो संशोधन प्रस्ताव राष्ट्रिय प्रतिवद्धताको विषय भएकोले द्रुतगतिमा पारित गर्नुपर्ने बताएका हुन् । उनले नेपालको परिवर्तित नक्सा संविधानको अंग भएसंगै राष्ट्रिय स्वाभिमानको लडाईंमा एउटा महत्वपूर्ण अध्यायको सुरुवात भएको बताएका छन् ।

‘यस उप्रान्तको काम कूटनीतिक रुपमा अझै जिम्मेवारीपूर्वक गर्नुपर्नेछ । यतिखेर भारतले नेपाली भुभामा उपस्थितिसँगै नियन्त्रण राखेको छ’ उनले भनेका छन्, ‘अबको बाटो भनेको हामीले हाम्रो भूभागबाट भारतीय उपस्थिति तथा नियन्त्रणको अन्त्य गरी आफ्नो प्रभावकारी नियन्त्रण कायम गर्ने ।’

आन्तरिक मामिलामा मतभेद भए पनि राष्ट्रिय स्वाभिमानका खातिर परिर्वतित नक्सा जारी गर्ने सन्दर्भमा सबै एक ठाउँमा उभिएको उनले बताएका छन् । नेपाली भूभागमा नेपाली सार्वभौम शक्ति स्थापित नभएसम्म यो एकता अझ कायम रहनुपर्ने थापाले बताए ।

त्यसका लागि नेपालले लिने कूटनीतिक बाटो तथा पहलमा कार्यगत प्रष्टता ल्याउन आपसी रुपमा विविध अभ्यास गर्नुपर्ने भन्दै उनले भनेका छन्, संविधानमा नयाँ नक्सा संशोधन गरेसँगै भारतको उपस्थिति तथा नियन्त्रणबाट नेपाली भूभाग प्रभावकारी नियन्त्रणसहित फिर्ता लिइछाड्छौं भनेर संकल्प गरौं ।’

सीमासँग सम्बन्धित विषयमा कांग्रेस र नेकपा संसदले संसदमा दर्ता गरेको दुई संकल्प प्रस्तावलाई पुनर्लेखन गरेर परिवर्तित नक्सामा उल्लेख गरिएको लिम्पियाधुरा, लिपुलेकर कालापानीसहितको हाम्रो भूभाग नेपालको पूर्ण नियन्त्रणमा ल्याउने संकल्प सहितको साझा संकल्प प्रस्ताव मस्यौदा गरौं र सर्वसम्मत रुपमा संसदबाट पारित गरौं ।’

यसले आफ्नो भूमिमा प्रभावकारी नियन्त्रण स्थापित गर्न नेपालमा गम्भीर छ र नक्सा जारी गर्दा देखिएको एकता अब हुने कूटनीतिक पहलमा समेत कायम रहन्छ भन्ने सन्देश भारतसहित विश्व समुदायलाई जाने कांग्रेस संसद थापाले बताएका छन् ।