काठमाडौं- सर्वोच्च अदालतकी पहिलो महिला न्यायाधीश सुशीला सिंहको निधन भएको छ । उनको ८१ वर्षको उमेरमा शुक्रबार निधन भएको पारिवारिक स्रोतले जानकारी दिएको हो ।

१९९६ साल फागुन १२ गते जन्मेकी सिंह २०५८ साल वैशाख ६ गते सर्वोच्च अदालतमा अस्थायी न्यायाधीशको रुपमा सेवा प्रवेश गरेकी थिइन् । उनले २०६१ सालमा अवकाश पाएकी हुन् ।

सर्वोच्च अदालतबाट अवकाशपछि उनले राष्ट्रिय मानव अधिकार आयोगमा सदस्य भएर काम गरेकी थिइन।

उनी २०६२ साल जेठ १३ गतेदेखि २०६३ साल असार २५ गतेसम्म मानव अधिकार आयोगको सदस्य बनेकी थिइन। आफ्नो पूर्व सदस्यको निधनमा राष्ट्रिय मानव अधिकार आयोगले तीन दिनसम्म आधा झण्डा झुकाउने निर्णय गरेको छ ।

यसैबीच उनको निधनका कारण सर्वोच्च अदालतको सोमबारको इजलास पनि स्थगित हुने भएकाले छ । सर्वोच्च अदालतले पूर्वन्यायाधीशको निधनमा शोकस्वरुप अदालत बिदा दिने गरेको छ । आइतबार इदको सार्वजनिक बिदा परेका कारण सर्वोच्चले सोमबार इजलास स्थगित गर्नेछ।