डडेलधुरा– डडेलधुराको अमरगढी नगरपालिका वडा नं ५ मा रहेको उग्रतारा आयल स्टोरमा मिसावटको पेट्रोल विक्री हुने गरेको सेवाग्राहीले आरोप लगाएका छन् । उक्त पट्रोल पम्पको पेट्रोल प्रयोगले दर्जनौं मोटरसाईकल बिग्रिएको सेवाग्राहीहरुको भनाइ छ ।

शुक्रबार विहान मात्रै उक्त पेट्रोलपम्पबाट तेल हालेर फर्किएको एक सेवाग्राहीले आफ्नो मोटरसाइल क्षणभरमै बन्द भएपछि त्यहाँ पेट्रोलमा पानी मिसावट भएको दाबी गरे । उक्त पेट्रोल पम्पले यसअघि पनि अभावका बेला कालोबजारी गरेको, मिसावट पट्रोल वितरण गर्दै आएको आरोप लगाउँदै क्षतिपूर्तिको माग गरेका छन् ।

सेवाग्राहीहरुले आफू ठगीएको भन्दै प्रमुख जिल्ला अधिकारी, प्रहरी प्रमुख तथा नगरपालिकाका प्रमुख र पेट्रोलपम्पका संञ्चालकलाई समेत बोलाएर क्षतिपुर्ति दिनुपर्ने माग राखेका छन् ।

यता पेट्रोलपम्प संञ्चालक भने आफुले कमजोरी नगरेको र मिसावट देखिएमा पेट्रोलमा मिसावट गर्नेलाई कारवाही गर्न आफू तयार रहेका बताएका छन् । पेट्रोल पम्प सञ्चालक डडेलधुराको अमरगढी नगरपालिका वडा नं. ८ का वडाध्यक्ष नरबहादुर साँकी हुन् ।

प्रमुख जिल्ला अधिकार मोहनराज जोशीले उक्त पेट्रोल पम्पको पेट्रोल नमुना परीक्षणका लागि लगिएको र मिसावट भेटिएमा कारबाही गर्ने प्रतिवद्धता जनाएका छन् ।