काठमाडौं – कोरोना भाइरसको संक्रमणले मुलुक लकडाउनमा रहेका बेला आर्थिक गतिविधि चलायमान नभइरहेका बेला पनि मुक्ति विकास बैंकका सूचक भने सकारात्मक देखिएका छन् ।

अधिकांश वाणिज्य बैंकहरुले खराब वित्तीय विवरण सार्वजनिक गरिरहेका बेला मुक्तिनाथ विकास बैंकले भने नाफा बढेको तथा वितरणयोग्य मुनाफा पनि सन्तोषजनक नै रहेको विवरण सार्वजनिक गरेको हो ।

बैंकले चालु आर्थिक वर्षको तेस्रो त्रैमाससम्मा अघिल्लो वर्षको यही अवधिको तुलनामा ५ करोड रुपैयाँ बढी नाफा कमाएको छ ।

यो अवधिमा ६७ करोड ६० लाख नाफा आर्जन गरेको बैंकले अघिल्लो वर्षको यही अवधिमा ६२ करोड ५५ लाख रुपैयाँ नाफा आर्जन गरेको थियो ।

बैंकले समीक्षा अवधिमा वितरणयोग्य मुनाफा पनि ३२ करोड ३७ लाख आर्जन गरेको छ ।

चुक्तापूँजी ४ अर्ब ३२ करोड रुपैयाँ रहेको बैंकको प्रिमियममा ६ करोड ४० लाख रुपैयाँ छ ।

प्रिमियममा रहेको रकम समेत लाभांशको रुपमा वितरण गर्न सकिने भएकोले मुक्तिनाथले लगानीकर्तालाई निराश नपार्ने देखिएको छ ।

बैंकले तेस्रो त्रैमाससम्म २ अर्ब १० करोड खूद ब्याज आम्दानी गरेको देखिएको छ । अघिल्लो वर्षको यही अवधिसम्म यस्तो आम्दानी १ अर्ब ८१ करोडमा सीमित थियो ।

समीक्षा अवधिमा बैंकले ५० अर्ब ९४ करोड निक्षेप संकलन गरी ४७ अर्ब ५६ करोड कर्जा प्रवाह गरेको छ भने यही अवधिमा ४१ अर्ब ४७ करोड निक्षेप संकलन गरी ३८ अर्ब १४ करोड बढी कर्जा परिचालन गरेको छ।