काठमाडौं – फिल्म ‘कबड्डी’ निर्देशन गरेपछि निर्देशक रामबाबु गुरुङ एकाएक चर्चामा आए । एक सामान्य कथामा उनले देखाएको निर्दशकीय क्षमताले चर्चा कमायो ।

फिल्मवृत्तमा गुरुङको निर्देशकीय क्षमताको तारिफ भयो । तर, पछिल्लो समय भने उनको निर्देशनमा नयाँपन नदेखिएको भन्दै विरोध हुन थालेको छ । गतवर्ष गुरुङले निर्देशन गरेको फिल्म ‘कबड्डी ३’ ले राम्रो चर्चा कमायो । अर्को फिल्म ‘सेन्टी भाइरस’ ले भने न दर्शकको साथ पाउन सक्यो, न त फिल्मलाई समीक्षकले नै मन पराए ।

उही सूत्र निरन्तर प्रयोग गर्दा निर्देशक गुरुङ असफल हुँदै गएका छन् । ‘कबड्डी’ सिरिजले बाहेक अरु फिल्मले आशा गरिएअनुरुप प्रतिक्रिया पाउन सकेका छैनन् । उस्तै फिल्म मात्र होइन, रामबाबु गुरुङले आफ्ना फिल्ममा कलाकार पनि उनै दोहोर्‍याउँछन् ।

‘कबड्डी’ टिमका कलाकार नै अरु फिल्ममा देख्न सकिन्छ । पछिल्लो फिल्म ‘सेन्टी भाइरस’ मा पनि उनै कलाकार दोहोरिएका थिए । ‘साँइली’ मा पनि प्रायः उनै कलाकार देख्न सकिन्छ ।

हरेक फिल्ममा उनै कलाकारलाई अभिनय गराउनु र उस्तै फिल्म बनाउँदा निर्देशक गुरुङलाई दर्शकले शंका गर्न थालेका छन् । भोलिका दिनमा फरक कथामा पनि फिल्म उनेर केही पृथकता दिन सकेनन् भने गुरुङ पनि अरु कलाकारभन्दा फरक नहुने भन्दै दर्शकले टिप्पणी गर्न थालेका छन् ।