काठमाडौं- कृषि मन्त्रीसमेत रहेका नेकपाका नेता घनश्याम भूसालले सत्तारुढ दलमा अहिले देखिएको समस्या समाधान गर्नेबारे तीन–बुँदे उपाय सुझाएका छन् ।

भुषालले पार्टी एकता बचाउन संवादमा जोड दिन आग्रह गरेका छन् । सामाजिक संजाल फेसबुकमा उनले नेकपाभित्रको विवाद उत्कर्षमा पुगेको भन्दै उनले तीन बुँदै सुझाव दिएका हुन् ।

अहिले देशले सबै पार्टी सदस्यबाट जिम्मेवारी बोधको ऐतिहासिक गम्भीरता माग गरेको बताउँदै उनले त्यो सुझाव व्यक्त गरेका हुन्।

‘२०५४ सालमा नेकपा एमाले लोकप्रियताको शिखरमा थियो, फुट्यो र २०४७ सालको प्रजातन्त्र अस्थिर हुँदै गयो,’ नेकपाका स्थायी समिति सदस्य समेत रहेका भूसालले सामाजिक सञ्जालमा लेखेका छन्, ‘२०६४ र ६५ मा नेकपा माओवादी प्रलयकारी शक्तिकासाथ अगाडि आयो। र विभाजनको प्रक्रियामा गयो।’

उनले भनेका छन्, ‘समस्याले उपयुक्त समाधान खोज्छ । अनुपयुक्त र गलत प्रयासले समस्यालाई झनै बढाउँछ। पार्टीको एकता बचाउन, लोकतन्त्र र समाजवादका मूल्यहरुको जगेर्ना गर्न पहिलो-नहडबडाउँ, दोस्रो-संवाद गरौं र तेस्रो- संस्थागत प्रणालीभित्रै समाधान खोजौं । मुलुकले सबै कमरेडहरुबाट जिम्मेवारी बोधको ऐतिहासिक गम्भीरता माग गरेको छ।’