ललितपुर – ललितपुर महानगरपालिकाले गरीब, असहाय, दैनिक मजुदरी गर्ने श्रमिकका लागि खान खुवाउन मेस ( सामूहिक भोजन) सुरु गरेको छ । यो मेस लकडाउनको समयसम्मका लागि हो ।

यो मेस अहिले वडा नं ३ र १५ मा सुरु भइसकेको छ । अन्य वडाहरुमा आवश्यक सामान पु¥याइसकेको महानगरपालिकाले जनाएको छ ।

आवश्यक तयारी जतिसक्दो छिटो पुरा गरेर मेस संचालन गरिने महानगरले उल्लेख गरेको छ ।

सरकारले कोरोना भाइरस संक्रमण फैलनबाट जोगिन लम्बाएको लकडाउनका कारण गरीब, र श्रमिक वर्गलाई हात मुख जोर्ने समस्या नहोस् भनेर मेस संचालन गरिएको महानगरका प्रमुख चिरीबाबु महर्जनले बताए ।

यसअघि ललितपुर महानगरले नेपाल सरकारले गरेको राहत वितरणको निर्देशनलाई आधार मानेर महानगरपालिकाको स्रोतले भ्याउने गरी राहत वितरण गरेको थियो ।

मेस संचालन कुन ठाउँमा गर्ने वडा कार्यालयले नै निर्णय गर्ने महानगरपालिकाले जनाएको छ ।

‘खुल्ला र सफा स्थानमा सामाजिक दुरी कायम गरेर मेस संचालन गर्न हामीले भनेका छौं ’ प्रमुख महर्जनले बताए । मेसमा दिनको दुई पटक खाना खुवाइनेछ । बिहान १० बजे र साँझ ६ बजे खाना खुवाइनेछ ।