काठमाडौं –  सन् २०२१ भित्र पनि कोरोना भाइरसको महामारी नरोकिए टोकियो ओलम्पिक रद्द गरिने भएको छ ।

टोकियो ओलम्पिक आयोजक समितिका अध्यक्ष योयिरो मोरीले अर्को वर्षको अन्तिमसम्ममा पनि कोरोना भाइरसको महामारी नियन्त्रणमा नआए टोकियो ओलम्पिक २०२० रद्द गरिने बताएका हुन् ।

कोरोनाका कारण एक वर्ष पछि सारिएको प्रतियोगिता महामारीले सन् २०२१ मा पनि हुने अवस्था नआए रद्द नै गरिने उनले जानकारी दिएका हुन् ।

अन्तर्राष्ट्रिय ओलम्पिक कमिटी (आईओसी) र जापान सरकारले यसअघि नै प्रतियोगिता एक वर्ष पर सारेका छन्।

कोरोना भाइरसको महामारी रोकिए प्रतियोगिता सन् २०२१ को जुलाई २३ मा सुरु भएर अगष्ट ८ मा समापन हुनेछ ।

टोकियो ओलम्पिक आयोजक समितिका प्रवक्ता मासा तकायाले भने अध्यक्षको भनाईप्रति आलोचना गरेका छन् । उनले मोरीको भनाइलाई आधिकारीक नमान्न पनि आग्रह गरेका छन् ।