काठमाडौं– यू–१९ विश्वकप एसिया छनोटको तयारीका लागि भारत भ्रमणमा रहेको नेपाली यु—१९ टोलीले तेस्रो खेलमा आध्र प्रदेशमाथि रोमाञ्चक जीत हात पारेको छ । नेपाली टोलीले आन्ध्र प्रदेश यू–१९ टोलीमाथि १ विकेटको जीत हात पारेको हो ।

पहिलो ब्याटिङ गरेको घरेलु टोलीले दिएको २ सय २८ रनको लक्ष्य पछ्याएको नेपाली टोलीले ४७ ओभर ३ बलमा ९ विकेट गुमाएर २ सय ३० रन बनाउँदै लक्ष्य पूरा गरेको थियो ।

नेपालका लागि कप्तान रोहित कुमार पौडेलले ६ चौका र २ छक्काको मद्दतमा ७१ रन बनाए । त्यस्तै, भीम सार्की अर्धशतक बनाउनबाट मात्रै एक रनले चुकेका थिए । उनले ४९ रन बनाए भने सन्दीप जोराले १९ रन बनाएका थिए ।

नेपालविरुद्ध आध्र प्रदेशका एसएमडी कामीले ५ विकेट लिएका थिए । यसअघि पहिलो ब्याटिङ गरेको आध्र प्रदेशले ४९.१ ओभरमा सबै विकेट गुमाएर २ सय २७ रन बनाउँदा आध्र प्रदेशका बी योगानन्दले ५९ रन बनाए । यस्तै, नितिस कुमारले ५१ रन, पी सुब्रमुन्यमले ४५ रन र रामप्रसाद २६ रन बनाएका थिए ।

आध्र प्रदेशविरुद्ध नेपालका कमल सिंंह ऐरीले ४ विकेट लिए भने पवन सरार्फले ३ र प्रतिश जिसी, राशिद खान र सागर ढकाल समान एक—एक विकेट लिएका थिए । नेपालले यसअघि खेलेका २ खेलमा १ खेलमा जीत हात पारेको थियो भने दोस्रो खेलमा हार व्यहोरेको थियो ।