काठमाडौं – यस वर्ष अभिनेता दयाहाङ राईले अभिनय गरेका ४ वटा फिल्म रिलिज भए । एकपछि अर्को फिल्ममा अभिनय गरेर आफ्नो स्टारडम ध्वस्त बनाएको आरोप पनि उनले खेपिरहेका छन् ।

यसपटक भने उनले पहिलेजस्तो दर्शकको गाली खानुपरेन । दयाहाङलाई फ्यानले पहिलेजस्तो नोटिस गर्न छोडिसकेका छन् । किनकि, दयाहाङले अभिनय गरेका फिल्म धेरै भएर दर्शक मोनोटोनस भइसकेका छन् ।

दयाहाङले अभिनय गरेका दुई फिल्म जात्रै जात्रा र कबड्डी ३ ले व्यावसायिक सफलता हात पारे पनि दुई फिल्म सेन्टीभाइरस र आप्पा भने खासै सफल भएनन् । व्यावसायिक हिसाबले दयाहाङ भएका दुई फिल्म हिट भए । अर्को फिल्म सेन्टीभाइरस पनि राम्रै चर्चामा रह्यो । तर आप्पाले न चर्चा कमायो, न लगानी ।

अन्य फिल्मका तुलनामा फिल्म ‘आप्पा’ केही फरक थियो । यद्यपि यो फिल्मले व्यावसायिक सफलता हात पार्न सकेन । फिल्ममा दयाहाङ राई एक पिताको भूमिकामा देखिएका छन् ।

दयाहाङको अभिनय रहेको फिल्म ‘जात्रै जात्रा’ हिट भयो । फिल्मको तारिफ पनि भयो । तर, यो फिल्मबाट दयाहाङले भन्दा धेरै चर्चा विपिन कार्की, रविन्द्र झा र रविन्द्र सिंह बानियाँले पाए । हिट सिक्वेलमा दयाहाङको इन्ट्री भए पनि उनले खासै चर्चा कमाएनन् ।

दयाहाङका रिलिज फिल्ममध्ये सफल फिल्म हो, कबड्डी ३ । यो फिल्मबाट दयाहाङले काजीका चरित्रका रुपमा चर्चा कमाए ।

यसअघि दुई भाग हिट भइसकेका कारण पनि ‘कबड्डी ३’ ले राम्रो चर्चा कमायो । यो फिल्ममा दयाहाङ शीर्ष भूमिकामा थिए ।

वर्षको अन्तिममा रिलिज भएको फिल्म ‘सेन्टीभाइरस’ मा पनि दयाहाङ राईको भूमिका थियो । फिल्ममा उनले पार्टीका इमान्दार कार्यकर्ताको भूमिका निभाएका थिए । यो फिल्म भने व्यावसायिक रुपमा त्यति सफल हुन सकेन ।

यो वर्षलाई हेर्दा दयाहाङले दर्शकलाई कम निराश बनाएका छन् । उनले यस वर्ष राम्रो फिल्म छानेर काम गरेको भन्दै टिप्पणी हुन थालेको छ ।