काठमाडौं– कोरोना भाइरस (कोभिड १९)को संक्रमण रोक्न सरकारले जारी गरेको लकडाउनको आदेश उल्लंघन गर्ने झन्डै १६ सय जना पक्राउ परेका छन् ।

काठमाडौं, ललितपुर र भक्तपुरबाट गरी प्रहरीले मंगलबार १ हजार ५ सय ९५ जनालाई लकडाउन उल्लंघन गरेको आरोपमा पक्राउ गरेको हो ।

महानगरीय प्रहरी कार्यालय रानीपोखरीका प्रमुख प्रहरी नायव महानिरीक्षक (डीआईजी) विश्वराज पोखरेलले लकडाउन उल्लंघन गर्नेहरुलाई नियन्त्रणमा लिइ ३ घण्टासम्म होल्ड गरेर छाडिएको जानकारी दिए ।

प्रहरीका अनुसार लकडाउन उल्लंघन गर्ने क्रममा बिहानीको समयमा बढी हुने गर्छ । मंगलबार पनि बिहान ८ बजेसम्म मात्रै १ हजार ३ सय ३१ जना लकडाउन उल्लंघन गरेको आरोपमा पक्राउ परेका थिए ।

यस्तै, प्रहरीले मंगलबार लकडाउन उल्लंघन गर्ने ५ सय ४५ वटा सवारीसाधनलाई पनि नियन्त्रणमा लिएको छ ।