जेनेभा : विश्वभर महामारीको रूपमा फैलिएको कोरोना भाइरसविरुद्धको लडाईंका लागि विश्व फुटबल महासंघ (फिफा) र विश्व स्वास्थ्य संगठन (डब्लूएचओ) ले साझा अभियान अघि सारेका छन् ।

उनीहरुले जेनेभास्थित डब्लूएचओको मुख्यालयबाट कोरोनाको संक्रमणबाट जोगिन र रोकथामका लागि ‘कोरोना भाइरस किक आउट टु मेसेज’ नामक अभियान शुरु गरेका हुन् ।

उनीहरुले संसारभर फैलिएको कोरोनाबाट मुक्त रहन सन्देश प्रवाह गर्नेछन् । यस अभियानले डब्लूएचओको निर्देशन अनुरूप कोरोनाको संक्रमणबाट मुक्त रहन मुख्य पाँचवटा कदम चाल्न सामाजिक सन्देश प्रवाह गरेको छ।

जसमा मानिसले आफ्नो स्वास्थ्यको रक्षा गर्न साबुनपानीले हात धुने, अर्को व्यक्तिसँग हात नमिलाउने, अनुहारमा नछुने, अरू व्यक्तिसँग शारीरिक दूरी बढाउने र अस्वस्थ महसुस भएमा क्वारेन्टाइन बस्न प्रोत्साहन गर्ने लगायतका विषय समेटिएका छन् ।

यस अभियानलाई संसारभर फैलाउन सन्देशमूलक भिडियोसमेत बनाइएको छ। जहाँ विभिन्न देशका चर्चित २८ जना फुटबल खेलाडीलाई प्रयोग गरिएको छ। उक्त सन्देश विभिन्न १२ भाषामा समेत तयार पारिएको छ।

फिफाले कोरोना भाइरसविरुद्ध लड्न गत साता डब्लूएचओलाई आर्थिक सहयोगको घोषणा समेत गरेको थियो।

फिफा अध्यक्ष इन्फान्टिनोले डब्लूएचओलाई १० मिलियन अमेरिकी डलर सहयोगको घोषणा गरेका थिए ।

कोरोना भाइरसको जोखिमका कारण अहिले विश्वभर सबै फुटबल गतिविधिहरू ठप्प छन्।